ନୂଆଦିଲ୍ଲୀ: ଇସ୍ରାଏଲ ଓ ଇରାନ ମଧ୍ୟରେ ଚାଲିଥିବା ସଂଘର୍ଷ ମଧ୍ୟରେ ଭାରତ ସରକାରଙ୍କ ଅପରେସନ ସିନ୍ଧୁ ଅଧୀନରେ ଇରାନରୁ ଆଉ ଅଧିକ ଭାରତୀୟ ନାଗରିକଙ୍କୁ ସୁରକ୍ଷିତ ଭାବେ ଫେରାଇ ଆଣିଛନ୍ତି। ରବିବାର ଏକ ବିଶେଷ ବିମାନ ଯୋଗେ ଅନେକ ଭାରତୀୟ ତେହେରାନରୁ ଭାରତ ଫେରିଛନ୍ତି।
ଭାରତ ସରକାରଙ୍କ ଏହି ଉଦ୍ଧାର ଅଭିଯାନ ଇରାନରେ ରହୁଥିବା ଭାରତୀୟ ନାଗରିକମାନଙ୍କୁ ସୁରକ୍ଷିତ ଦେଶକୁ ଫେରାଇ ଆଣିବା ପାଇଁ ଆରମ୍ଭ ହୋଇଛି। ବୈଦେଶିକ ମନ୍ତ୍ରାଳୟ ଏହି ଅଭିଯାନକୁ ତ୍ୱରାନ୍ୱିତ କରିଛି, ଯେଉଁଥିରେ ବିଶେଷ ବିମାନ ସେବା ମାଧ୍ୟମରେ ନାଗରିକମାନଙ୍କୁ ଉଦ୍ଧାର କରାଯାଉଛି। ରବିବାର ତେହେରାନରୁ ଏକ ବିମାନ ନୂଆଦିଲ୍ଲୀରେ ଅବତରଣ କରିଥିବା ଜଣାପଡ଼ିଛି। ଯେଉଁଥିରେ ଅନେକ ଛାତ୍ରଙ୍କ ସମେତ ଇରାନରେ କାର୍ଯ୍ୟ କରୁଥିବା ଶ୍ରମିକ ଏବଂ ଅନ୍ୟାନ୍ୟ ଭାରତୀୟ ନାଗରିକ ମଧ୍ୟ ରହିଥିଲେ।
ଇସ୍ରାଏଲ ଓ ଇରାନ ମଧ୍ୟରେ ଚାଲିଥିବା ବିବାଦ ତୀବ୍ର ହେବା ସହ ଆମେରିକାର ଇରାନର ପରମାଣୁ କେନ୍ଦ୍ର ଉପରେ ଆକ୍ରମଣ ପରେ ଗଲ୍ଫ ଅଞ୍ଚଳରେ ଅସ୍ଥିରତା ବଢ଼ିଛି। ଏହି ସଂଘର୍ଷ ଯୋଗୁ ଇରାନରେ ରହୁଥିବା ବିଦେଶୀ ନାଗରିକ ବିଶେଷକରି ଭାରତୀୟମାନେ ଅସୁରକ୍ଷିତ ଅନୁଭବ କରୁଛନ୍ତି। ଏହାର ପରିଣାମ ସ୍ୱରୂପ ଭାରତ ସରକାର ଅପରେସନ ସିନ୍ଧୁ ଆରମ୍ଭ କରି ଭାରତୀୟ ନାଗରିକମାନଙ୍କୁ ସିୱଦେଶକୁ ପ୍ରତ୍ୟାବର୍ତ୍ତନ କରାଉଛନ୍ତି।
ଏନେଇ ବୈଦେଶିକ ମନ୍ତ୍ରୀ ଏସ. ଜୟଶଙ୍କର କହିଛନ୍ତି ଯେ, “ଆମେ ଇରାନରେ ରହୁଥିବା ପ୍ରତ୍ୟେକ ଭାରତୀୟଙ୍କ ସୁରକ୍ଷା ପାଇଁ ପ୍ରତିଶ୍ରୁତିବଦ୍ଧ। ଅପରେସନ ସିନ୍ଧୁ ଜରିଆରେ ଆମେ ସେମାନଙ୍କୁ ସୁରକ୍ଷିତ ଭାବେ ଦେଶକୁ ଫେରାଇ ଆଣୁଛୁ।” ତେହେରାନସ୍ଥିତ ଭାରତୀୟ ଦୂତାବାସ ମଧ୍ୟ ସ୍ଥାନୀୟ ଭାରତୀୟ ନାଗରିକମାନଙ୍କ ସହ ନିରନ୍ତର ଯୋଗାଯୋଗ ରଖି ସେମାନଙ୍କୁ ସହାୟତା ଯୋଗାଇ ଦେଉଛି।
ଫେରିଥିବା ଜଣେ ଭାରତୀୟ ଛାତ୍ର କହିଛନ୍ତି ଯେ, “ଇରାନରେ ଆମମାନଙ୍କ ସ୍ଥିତି ଦିନକୁ ଦିନ ଖରାପ ହେବାରେ ଲାଗିଥିଲା। ଆମେ ଭୟଭୀତ ଥିଲୁ, କିନ୍ତୁ ଭାରତ ସରକାରଙ୍କ ସମୟୋଚିତ ହସ୍ତକ୍ଷେପ ମାଧ୍ୟମରେ ଆମେ ସୁରକ୍ଷିତ ଭାବେ ଘରକୁ ଫେରି ପାରିଛୁ।” ଅନ୍ୟ ଜଣେ ଶ୍ରମିକ କହିଛନ୍ତି ଯେ, “ଦୂତାବାସର ସହଯୋଗ ଏବଂ ବିଶେଷ ବିମାନ ବ୍ୟବସ୍ଥା ନଥିଲେ ଆମେ ଏତେ ସହଜରେ ଫେରି ପାରି ନଥାନ୍ତୁ।”
ବୈଦେଶିକ ମନ୍ତ୍ରାଳୟ ସୂଚନା ଦେଇଛି ଯେ ଇରାନରେ ଏବେ ମଧ୍ୟ ଅନେକ ଭାରତୀୟ ଫସି ରହିଛନ୍ତି। ଏବଂ ସେମାନଙ୍କୁ ଉଦ୍ଧାର କରିବା ପାଇଁ ଅଧିକ ବିଶେଷ ବିମାନ ପଠାଯିବ। ସରକାର ମଧ୍ୟ ଇରାନରେ ରହୁଥିବା ଭାରତୀୟମାନଙ୍କୁ ଦୂତାବାସ ସହ ଯୋଗାଯୋଗ ରଖିବାକୁ ଅନୁରୋଧ କରିଛନ୍ତି। ମଧ୍ୟପ୍ରାଚ୍ୟରେ ଅସ୍ଥିରତା ଜାରି ରହିଥିବା ବେଳେ, ଭାରତ ତା’ର ନାଗରିକମାନଙ୍କ ସୁରକ୍ଷାକୁ ପ୍ରାଥମିକତା ଦେଇ ଏହି ଉଦ୍ଧାର କାର୍ଯ୍ୟକୁ ତ୍ୱରାନ୍ୱିତ ଭାବେ ଜାରି ରଖିଛି।
