ଭୁବନେଶ୍ୱର,୧୫/୦୬: ରାଜଧାନୀର ଏକ ଆପାର୍ଟମେଣ୍ଟରୁ ୬୦ ଝାଡ଼ାବାନ୍ତି ଆକ୍ରାନ୍ତ ଚିହ୍ନଟ ହୋଇଛନ୍ତି । ସେମାନେ ବିଭିନ୍ନ ବେସରକାରୀ ଏବଂ ସରକାରୀ ହସ୍ପିଟାଲରେ ଚିକିତ୍ସିତ ହେଉଛନ୍ତି । ଦୂଷିତ ପାଣିରୁ ଏହି ସଂକ୍ରମଣ ବ୍ୟାପିଥିବା ସ୍ପଷ୍ଟ ହୋଇଛି । ଖବରପାଇ ବିଏମ୍ସି ଓ ସ୍ୱାସ୍ଥ୍ୟ ବିଭାଗର ଏକ ମିଳିତ ଟିମ୍ ଘଟଣାର ଯାଞ୍ଚ କରୁଛନ୍ତି । ସଂଖ୍ୟା ଆହୁରି ବୃଦ୍ଧି ପାଇବା ଆଶଙ୍କା କରାଯାଉଛି ।
କଳିଙ୍ଗନଗର ନିକଟ ଏକ ଆପାର୍ଟମେଣ୍ଟରେ ୫ ଦିନ ତଳେ କିଛି ଲୋକ ଝାଡ଼ାବାନ୍ତିରେ ଆକ୍ରାନ୍ତ ହୋଇଥିବା ଜଣାପଡ଼ିଥିଲା । ଏହି ସଂଖ୍ୟା କ୍ରମେ ବଢ଼ିଥିଲା । ୬୦ରୁ ଅଧିକ ଝାଡ଼ାବାନ୍ତି ଆକ୍ରାନ୍ତ ହସ୍ପିଟାଲରେ ଭର୍ତ୍ତି ହୋଇଥିବା ଜଣାପଡ଼ିଛି । ଏଠାରେ ଶତାଧିକ ଲୋକ ଆକ୍ରାନ୍ତ ହୋଇଥିବା ଆପାର୍ଟମେଣ୍ଟ ବାସିନ୍ଦାଙ୍କ ସଂଘ ସ୍ପଷ୍ଟ କରିଛି । ଊକ୍ତ ଆପାର୍ଟମେଣ୍ଟର ସଂଘ ସମ୍ପାଦକ ଲୋକନାଥ ସାହୁ ଏବଂ ସହ ସମ୍ପାଦକ ଅରବିନ୍ଦ ଚୌଧୁରୀ ଜଳ ନମୁନା ସଂଗ୍ରହ କରି ଆର୍ସିଏମ୍ଆରରେ ପରୀକ୍ଷା କରିଥିଲେ । ସେଥିରେ ପାଣି ସଂକ୍ରମିତ ହୋଇଥିବା ଜଣା ପଡ଼ିଥିଲା ।
ଖବରପାଇ ବିଏମ୍ସି ଓ ସ୍ୱାସ୍ଥ୍ୟ ବିଭାଗର ଏକ ଟିମ୍ ଘଟଣାସ୍ଥଳରେ ପହଞ୍ଚି ତଦାରଖ କରିଥିଲେ । ୱାଟ୍କୋ ପକ୍ଷରୁ ଏକ ଟିମ୍ ମଧ୍ୟ ସେଠାରେ ଯାଞ୍ଚ କରିଥିଲେ । ଉକ୍ତ ଆପାର୍ଟମେଣ୍ଟରେ ୧୨୩୬ ଫ୍ଲାଟ୍ ଅଛି । ପାଖାପାଖି ୫ ହଜାର ଲୋକ ସେଠାରେ ରହୁଛନ୍ତି । ଏଥି ନିମନ୍ତେ ମୋଟ ୯ଟି ପାଣିଟାଙ୍କି ଏବଂ ସମ୍ପ ରହିଛି । ତେବେ ପାଖରେ ଥିବା ଏକ ସ୍ୱେରେଜ ଟ୍ରିଟ୍ମେଣ୍ଟ ପ୍ଲାଣ୍ଟ (ଏସ୍ଟିପି)ର କାମ ଗତ କିଛି ଦିନ ତଳେ ହୋଇଥିଲା । ଏଥିରୁ ନିର୍ଗତ ବର୍ଜ୍ୟପାଣି ପିଇବା ପାଣିରେ ମିଶିଥିବା ଆଶଙ୍କା କରାଯାଉଛି । ସମସ୍ତ ଟାଙ୍କି ମାଟି ତଳେ ରହିଛି । ଏହି ସବୁ ଟାଙ୍କିକୁ ଠିକ ଭାବେ ପ୍ଲାଷ୍ଟର କରାଯାଇନି । ଟାଙ୍କି ନିର୍ମାଣ ମଧ୍ୟ ଗାଇଡ୍ଲାଇନ୍ ଅନୁସାରେ ହୋଇନି । ସେଥିମଧ୍ୟରୁ ଆଇ-ବ୍ଲକ ଟାଙ୍କି ପାଣି ୱାଟ୍କୋ ପକ୍ଷରୁ ଯାଞ୍ଚ କରାଯାଇଥିଲା । ସେଥିରେ ଅତି ଦୂଷିତ ପାଣି ଥିବା ନେଇ ସ୍ପଷ୍ଟ କରାଯାଇଛି । ଡାକ୍ତର ନୀଳମଣି ସେନାପତି କହିଛନ୍ତି, ଆମେ ଖବର ପାଇବା କ୍ଷଣି ସେଠାରେ ଯାଞ୍ଚ କରିଛୁ । ବିଏମ୍ସି ଟିମ୍ ତଦାରଖ କରୁଛି । ତାଙ୍କ ରିପୋର୍ଟ ଅନୁସାରେ ପରବର୍ତ୍ତୀ ପଦକ୍ଷେପ ନିଆଯିବ ।
ଖାଲି ଏହି ଆପାର୍ଟମେଣ୍ଟ ନୁହେଁ, ଭୁବନେଶ୍ୱରର ଅନ୍ୟ କିଛି ଅଞ୍ଚଳରେ ମଧ୍ୟ ଡାଇରିଆ ଓ ଜଣ୍ଡିସ୍ ବ୍ୟାପୁଛି । ରାଜଧାନୀ ସ୍ୱାସ୍ଥ୍ୟ ଓ ପରିମଳ ସମ୍ପୂର୍ଣ୍ଣ ବିଗିଡ଼ି ଯାଇଥିବା ଅଭିଯୋଗ ହୋଇଛି । କିଛିଦିନ ତଳେ ଖଣ୍ଡଗିରିର ଏକ ଘରୋଇ ସ୍କୁଲରୁ ଡାଇରିଆ ଆକ୍ରାନ୍ତ ଛାତ୍ରଛାତ୍ରୀ ଚିହ୍ନଟ ହୋଇଥିଲେ । ସେହିପରି ଚନ୍ଦ୍ରଶେଖରପୁର ବିଡିଏର ଆବାସରେ ମଧ୍ୟ ଅନେକ ଲୋକ ଝାଡ଼ାବାନ୍ତିର ଶିକାର ହୋଇଥିଲେ । ବର୍ଷା ଦିନ ଆଗରୁ ସ୍ଥିତି ଅଣାୟତ୍ତ ହେଲାଣି ।
