ଉମରକୋଟ ୧୫/୦୬ : ସ୍ବାମୀ-ସ୍ତ୍ରୀ ବିଷ ପିଇଲେ । ୩ ପିଲାଙ୍କ ଖାଇବାରେ ବି ବିଶ ମିଶାଇ ଦେଲେ । ବିଷ ଜ୍ବାଳାରେ ୩ ନିଷ୍ପାପ ଶିଶୁଙ୍କ ଜୀବନ ଚାଲିଗଲା । ଏବେ ହସ୍ପିଟାଲରେ ଜୀବନ ସହ ସଂଘର୍ଷ କରୁଛନ୍ତି ଦମ୍ପତି । ଛତିଶଗଡ଼ କାଙ୍କେର ଜିଲ୍ଲା ପରତାପୁର ଥାନା ଚନ୍ଦ୍ରପୁର ଗ୍ରାମପଞ୍ଚାୟତ ଶାନ୍ତିନଗର ସ୍ଥିତ ପିଭି-୭୦ ଗାଁରୁ ଆସିଛି ଏପରି ମନକୁ ଆନ୍ଦୋଳିତ କଲା ପରି ଖବର ।
ପିଭି-୭୦ ଗାଁର ରମେଶ ବୈରାଗୀ । ପତ୍ନୀ ଓ ୩ ପିଲାଙ୍କୁ ନେଇ ତାଙ୍କ ସଂସାର । ତେବେ ରମେଶ କାହିଁକି ଏପରି ଚରମ ନିଷ୍ପତ୍ତି ନେଲେ ତାହା ସ୍ପଷ୍ଟ ହୋଇନି । ଘରର ଆର୍ଥିକ ସ୍ଥିତି ଖରାପ ଯୋଗୁ ସେ ଆତ୍ମହତ୍ୟା ପରି ଚରମ ନିଷ୍ପତ୍ତି ନେଇଥିବା କୁହାଯାଉଛି । ତେବେ ତଥ୍ୟ ମୁତାବକ ରମେଶଙ୍କ ଆର୍ଥିକ ସ୍ଥିତି ଭଲ ନଥିଲା । ଉଧାର କରଜରେ ବୁଡିଯାଇଥିଲେ ସେ । ଯାହାକୁ ନେଇ ସବୁବେଳେ ପତ୍ନୀଙ୍କ ସହ ଝଗଡ଼ା ଲାଗି ରହୁଥିଲା। ଶୁକ୍ରବାର ରାତିରେ ମଧ୍ୟ ସେହି କଥାକୁ ନେଇ ସ୍ବାମୀ-ସ୍ତ୍ରୀଙ୍କ ମଧ୍ୟରେ ବଚସା ହୋଇଥିବା କହିଛନ୍ତି ପଡୋଶୀ । ତେବେ ସକାଳୁ ରମେଶଙ୍କ ଘର କବାଟ ଖୋଲି ନଥିବା ଦେଖି ପଡୋଶୀଙ୍କ ସନ୍ଦେହ ହୋଇଥିଲା । ଘର ଭିତରେ ପଶି ଯାହା ଦେଖିଲେ କାହା ମୁଣ୍ଡ କାମ କରିନଥିଲା ।
୩ଶିଶୁ ସବୁଦିନ ପାଇଁ ଶୋଇ ଯାଇଥିବାବେଳେ ରମେଶ ଓ ପତ୍ନୀ ଛଟପଟ ହେଉଥିଲେ । ଘର ଭିତରେ ରାତିର ଖାଇବା ଓ ଥାଳି ଏଣେତେଣେ ପଡିଥିଲା । ସ୍ଥାନୀୟ ଲୋକେ ପୋଲିସକୁ ସଙ୍ଗେ ସଙ୍ଗେ ଖବର ଦେଇଥିଲେ । ଗୁରୁତର ଅବସ୍ଥାରେ ସେମାନଙ୍କୁ ସ୍ଥାନୀୟ ପାଖାଞ୍ଚର ସ୍ଥିତ ସିଭିଲ୍ ହସ୍ପିଟାଲରେ ଭତ୍ତି କରାଯାଇଛି। ଉଭୟଙ୍କ ଅବସ୍ଥା ଗୁରୁତର ଥିବା କହିଛନ୍ତି ଡାକ୍ତର । ତେବେ ଆତ୍ମହତ୍ୟା ଉଦ୍ୟମ ପଛରେ ଆର୍ଥିକ ସମସ୍ୟା ନା ଆଉ କିଛି କାରଣ ରହିଛି ତାର ଛାନଭିନ ଚଳାଇଛି ପୋଲିସ ।
