ପୁରୀ, ୧୭/୦୬: ପରଲୋକରେ ଶ୍ରୀକ୍ଷେତ୍ରର ଥାଟ ରାଜା ତଥା ମହାପ୍ରଭୁଙ୍କ ଆଦ୍ୟ ସେବକ ଗଜପତି ଦିବ୍ୟସିଂହ ଦେବଙ୍କ ସାନ ଭାଇ ରଣାର୍ଣ୍ଣବ ଦେବ । ୬୭ ବର୍ଷ ବୟସରେ ତାଙ୍କର ମୃତ୍ୟୁ ହୋଇଛି । ଏହି ଘଟଣା ଶ୍ରୀନଅରରେ ଶୋକର ଛାୟା ଖେଳାଇ ଦେଇଛି । ଲିଭର ସିରୋସିସ୍ରେ ଆକ୍ରାନ୍ତ ଥିବା ବେଳେ ହଠାତ୍ ହୃଦଘାତ୍ରେ ତାଙ୍କର ପରଲୋକ ହୋଇଛି । ଶ୍ରୀନଅର ପକ୍ଷରୁ ରାଜକୀୟ ପରମ୍ପରା ଅନୁଯାୟୀ ତାଙ୍କର ଗୁପ୍ତ ଦାହ ସଂସ୍କାର ହୋଇଛି ।
ପରମ୍ପରା ଅନୁଯାୟୀ ରାଜାଙ୍କ ଶରୀର ସମ୍ପୂର୍ଣ୍ଣ ଭାବରେ ଢଙ୍କା ଯାଇଥିଲା । ଶରୀରର କୌଣସି ଅଙ୍ଗ ବାହାରକୁ ଦେଖାଯାଇନଥିଲା । ଶରୀର ଉପରେ ଚନ୍ଦନ କାଠ ଦେଇ ଆଚ୍ଛାଦିତ କରାଯାଇଥିଲା । ସ୍ୱର୍ଗଦ୍ୱାରଠାରେ ତାଙ୍କର ଦାହ ସଂସ୍କାର ହୋଇଥିଲା । ଏହି ସମୟରେ ରାଜ ପରିବାର ସଦସ୍ୟମାନେ ଉପସ୍ଥିତ ଥିଲେ । ପୁଅ ଦେବରାଜ ଦେବ ମୁଖାଗ୍ନି ଦେଇଥିଲେ । ଦେଉଳ କରଣ, ତଢ଼ଉ କରଣମାନେ ରାଜା ଘର ଏହି ଶୁଦ୍ଧିକ୍ରିୟା କରାଇଥିଲେ ।
ତେବେ ଏହି ଘଟଣା ମହାପ୍ରଭୁଙ୍କ ନୀତିକାନ୍ତି ତଥା ରଥଯାତ୍ରାରେ କୌଣସି ବ୍ୟାଘାତ କରିବ ନାହିଁ । ମହାପ୍ରଭୁଙ୍କ ଆଦ୍ୟ ସେବକ ଓ ଶ୍ରୀନଅର ପରମ୍ପରା ଅନୁସାରେ ରାଜା ଘରେ ଅନ୍ୟ ପରିବାର ସଦସ୍ୟଙ୍କ ମୃତ୍ୟୁ ହେଲେ ବି ଗଜପତି ଅଶୌଚ ହୁଅନ୍ତି ନାହିଁ । ତାଙ୍କ ପିତୃ ବିୟୋଗ ପରେ ମଧ୍ୟ ସେ ଅଶୌଚ ହୋଇନଥିଲେ । ସେ ବାଳକ ଅବସ୍ଥାରେ ଥିଲା ବେଳେ ତାଙ୍କୁ ତତକ୍ଷଣାତ୍ ରାଜା ଅଭିଷିକ୍ତ କରାଯାଇଥିଲା । ରାଜ୍ୟର ଅତିଥି ଭାବରେ ପିତାଙ୍କ ସତ୍କାର କାର୍ଯ୍ୟ କରିବାକୁ ସେ ନିର୍ଦ୍ଦେଶ ଦେଇଥିଲେ । ଯେତେବେଳେ କି ମହାପ୍ରଭୁଙ୍କ କୌଣସି କାର୍ଯ୍ୟରେ ଗଜପତି ଅନୁପସ୍ଥିତ ରହିଲେ ମୁଦିରସ୍ତ କାମ ଚଳାନ୍ତି । ଗଜପତି ବୀରକିଶୋର ଦେବଙ୍କ ଦୁଇ ପୁଅ ଓ ଗୋଟିଏ ଝିଅ ଥିଲେ । ଯାହାଙ୍କ ଭିତରେ ଗଜପତି ଦିବ୍ୟସିଂହ ଦେବ ବଡ଼ ଓ ଥାଟ ରାଜ ସାନ । ଥାଟ ରାଜା ବେଶ ଶାନ୍ତ ଓ ସରଳ ଥିଲେ । ତାଙ୍କ ନିଧନରେ ପରିବାର ଲୋକେ ଶୋକ ପ୍ରକାଶ କରିଛନ୍ତି ।
