ଜେରୁଜେଲେମ: ଇସ୍ରାଏଲ ପ୍ରତିରକ୍ଷା ବାହିନୀ (ଆଇଡିଏଫ) ସୋମବାର ଦିନ ଘୋଷଣା କରିଛି ଯେ ସେମାନେ ଇରାନର ୬ଟି ସାମରିକ ବିମାନଘାଟି ଉପରେ ବିମାନ ଆକ୍ରମଣ କରିଛନ୍ତି। ଯେଉଁଥିରେ ପ୍ରାୟ ୧୫ଟି ଯୁଦ୍ଧ ବିମାନ ଏବଂ ହେଲିକପ୍ଟର ଧ୍ୱଂସ ହୋଇଛି। ଏହି ଆକ୍ରମଣରେ ଏଫ-୧୪, ଏଫ-୫ ଏବଂ ଏଏଚ-୧ ପ୍ରକାରର ବିମାନ ସହିତ ରନୱେ, ଭୂତଳ ବଙ୍କର ଏବଂ ଇନ୍ଧନ ଯୋଗାଣ ବିମାନ ମଧ୍ୟ କ୍ଷତିଗ୍ରସ୍ତ ହୋଇଛି ବୋଲି ଆଇଡିଏଫ ସାମାଜିକ ଗଣମାଧ୍ୟମ ଏକ୍ସରେ ଏକ ପୋଷ୍ଟ ଜାରି କରିଛନ୍ତି।
ଆଇଡିଏଫ ମୁତାବକ, ଏହି ଆକ୍ରମଣ ଇରାନର ସାମରିକ କ୍ଷମତାକୁ ଦୁର୍ବଳ କରିବା ଏବଂ ଇସ୍ରାଏଲ ଉପରେ ସମ୍ଭାବ୍ୟ ଆକ୍ରମଣକୁ ରୋକିବା ପାଇଁ କରାଯାଇଛି। ଏହି ଅଭିଯାନ ଇରାନର ପଶ୍ଚିମ, ପୂର୍ବ ଏବଂ ମଧ୍ୟମ ଅଞ୍ଚଳରେ ଥିବା ବିମାନଘାଟିଗୁଡ଼ିକୁ ଟାର୍ଗେଟ କରିଥିଲା।
ଏହି ଆକ୍ରମଣ ଇସ୍ରାଏଲ ଏବଂ ଇରାନ ମଧ୍ୟରେ ଚାଲିଥିବା ଉତ୍ତେଜନାର ଏକ ଅଂଶ ବୋଲି ବିବେଚନା କରାଯାଉଛି। ଯେଉଁଥିରେ ଉଭୟ ଦେଶ ପରସ୍ପର ବିରୁଦ୍ଧରେ ମିସାଇଲ ଏବଂ ଡ୍ରୋନ ଆକ୍ରମଣ ଜାରି ରଖିଛନ୍ତି। ଗତ ସପ୍ତାହରେ ମଧ୍ୟ ଇସ୍ରାଏଲ ତେହେରାନ ନିକଟରେ ଥିବା ଏକ ବିମାନଘାଟିରେ ଦୁଇଟି ଏଫ-୧୪ ଟମକ୍ୟାଟ ଜେଟ ଧ୍ୱଂସ କରିଥିବା ନେଇ ଦାବି କରିଥିଲା।
ଏହି ଘଟଣା ମଧ୍ୟପ୍ରାଚ୍ୟରେ ଉତ୍ତେଜନାକୁ ଆହୁରି ବୃଦ୍ଧି କରିଛି। ଯେଉଁଠାରେ ଆମେରିକା ମଧ୍ୟ ଇରାନର ପରମାଣୁ ସ୍ଥାନଗୁଡ଼ିକୁ ଟାର୍ଗେଟ କରି ଆକ୍ରମଣ କରିଥିବା ରିପୋର୍ଟ ମିଳିଛି। ଇରାନର ସୁପ୍ରିମ ଲିଡର ଆୟାତୋଲ୍ଲା ଅଲି ଖାମେନେଇ ଇସ୍ରାଏଲକୁ "ଶାସ୍ତି" ଦେବା ଜାରି ରହିବ ବୋଲି କହିଛନ୍ତି।
ଆନ୍ତର୍ଜାତୀୟ ସମୁଦାୟ ଏହି ସଂଘର୍ଷରେ ନିୟନ୍ତ୍ରଣ ଓ ଶାନ୍ତି ପାଇଁ ଆହ୍ୱାନ ଜାରି କରିଛନ୍ତି। କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଉଭୟ ପକ୍ଷ ମଧ୍ୟରେ ଆକ୍ରମଣ ପ୍ରତିଆକ୍ରମଣ ଜାରି ରଖିଛନ୍ତି।
