ନୂଆଦିଲ୍ଲୀ: ଅପରେସନ ସିନ୍ଦୁରରେ ଭାରତର ବିମାନ ଆକ୍ରମଣରେ ପାକିସ୍ତାନ ଏପର୍ଯ୍ୟନ୍ତ ଅଣ୍ଟା ସଳଖି ପାରି ନାହିଁ । ଭାରତ ଶତ୍ରୁ ଦେଶର ଅନେକ ବିମାନ ଘାଟିକୁ ପ୍ରବଳ କ୍ଷତି ପହଞ୍ଚାଇଥିଲା। ଏହି କାରଣରୁ ପାକିସ୍ତାନ ପୁଣି ଥରେ ରହିମ ୟାର ଖାନ ବିମାନ ଘାଟି ପାଇଁ NOTAM (ଏୟାରମେନକୁ ନୋଟିସ) ଜାରି କରିଛି ।
OSINT ବିଶେଷଜ୍ଞ ଡେମିଏନ୍ ସାଇମୋନ୍ ସୋସିଆଲ ମିଡିଆ ପ୍ଲାଟଫର୍ମ X ରେ ସୂଚନା ଦେଇ ଲେଖିଛନ୍ତି ଯେ, ରହିମ ୟାର ଖାନ ବିମାନ ଘାଟି ପାଇଁ ପୁଣି ଥରେ NOTAM ଜାରି କରାଯାଇଛି। ଏହା ସେହି ସମାନ ରନୱେ ଯିଏକି ଭାରତୀୟ ସେନା ଦ୍ୱାରା ମେ ୨୦୨୫ ରେ ଏକ ବିମାନ ଆକ୍ରମଣରେ କ୍ଷତିଗ୍ରସ୍ତ ହୋଇଥିଲା। ବର୍ତ୍ତମାନ ଏହାକୁ ୪ ଜୁଲାଇ୨୦୨୫ ପର୍ଯ୍ୟନ୍ତ ବନ୍ଦ କରିଦିଆ ଯାଇଛି।
ପାକିସ୍ତାନର ରହିମ ୟାର ଖାନ ବିମାନ ଘାଟିକୁ ସେମାନଙ୍କ ବାୟୁସେନା ପାଇଁ ବହୁତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଏ। ଭାରତୀୟ ସେନାର କ୍ଷେପଣାସ୍ତ୍ର ଆକ୍ରମଣ ଯୋଗୁଁ ଏହି ଏୟାରବେସ୍ ବହୁତ କ୍ଷତି ସହିଛି। ଏହି ଏୟାରବେସ୍ ର କ୍ଷତି ପାକିସ୍ତାନୀ ସେନା ପାଇଁ ଏକ ବଡ଼ ଝଟକା ବୋଲି ବିବେଚନା କରାଯାଏ। କେନ୍ଦ୍ରର ମୋଦି ସରକାର ଆକ୍ରମଣକୁ ନିଶ୍ଚିତ କରି କହିଛନ୍ତି ଯେ, ପାକିସ୍ତାନର ସାମରିକ ଭିତ୍ତିଭୂମିକୁ ନିରପେକ୍ଷ କରିବା ଲକ୍ଷ୍ୟରେ ଏହି ନିଷ୍ପତ୍ତି ନିଆଯାଇଛି, ଯାହା ଦ୍ଵାରା ସାଧାରଣ ନାଗରିକମାନେ କ୍ଷତିଗ୍ରସ୍ତ ନ ହୁଅନ୍ତି ଏବଂ ଆତଙ୍କବାଦୀ ଆଡ୍ଡା ଗୁଡ଼ିକୁ ପ୍ରଭାବଶାଳୀ ଭାବରେ ସମାପ୍ତ କରାଯାଇପାରିବ।
ଅପରେସନ ସିନ୍ଦୁରର ମାତ୍ର କିଛି ଦିନ ପରେ, ପ୍ରଧାନମନ୍ତ୍ରୀ ମୋଦୀ ରାଜସ୍ଥାନର ବିକାନେରରେ ଏକ ରାଲିକୁ ସମ୍ବୋଧିତ କରି କହିଥିଲେ ଯେ ପାକିସ୍ତାନର ରହିମ ୟାର ଖାନ ଏୟାରବେସ୍ ଏବେ ବି ICUରେ ଅଛି, ଏହାକୁ କେବେ ମରାମତି କରାଯିବ ତାହା ଜଣାନାହିଁ।
