ଭୁବନେଶ୍ୱର,୨୧/୬ : ହସ୍ପିଟାଲକୁ ଆସୁଥିବା ରୋଗୀମାନେ ଯୋଗ ପ୍ରଶିକ୍ଷଣ ନେବେ। ଯୋଗାଭ୍ୟାସ କରି ଶରୀରକୁ ରୋଗମୁକ୍ତ କରିବେ । ସେଥିପାଇଁ ବିଭିନ୍ନ ଆୟୁଷ୍ମାନ ଆରୋଗ୍ୟ ମନ୍ଦିର(ସହରାଞ୍ଚଳ ସ୍ୱାସ୍ଥ୍ୟ ଓ ଆରୋଗ୍ୟ କେନ୍ଦ୍ର ଓ ସହରାଞ୍ଚଳ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର)ରେ ଯୋଗ ଶିବିର ପାଇଁ ପ୍ରାବଧାନ ରହିଛି । ପ୍ରତି ସ୍ୱାସ୍ଥ୍ୟ କେନ୍ଦ୍ର ପାଇଁ ଜଣେ ଯୋଗ ଇନଷ୍ଟ୍ରକ୍ଟରଙ୍କୁ ମଧ୍ୟ ନିଯୁକ୍ତି ମିଳିଛି । ହେଲେ ଯୋଗ ହେଉଛି ନା ଯୋଗାଭ୍ୟାସର ଉଦ୍ଦେଶ୍ୟ ସାଧନ ହୋଇପାରୁଛି । କେବଳ ସେତିକିନୁହେଁ ସହରାଞ୍ଚଳ ସ୍ୱାସ୍ଥ୍ୟ ଓ ଆରୋଗ୍ୟ କେନ୍ଦ୍ର(ୟୁଏଚଡବ୍ଲୁସି)ଓ ସହରାଞ୍ଚଳ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର(ୟୁପିଏଚ୍ସି)କୁ ଛାଡ଼ିଦେଲେ ସହରାଞ୍ଚଳ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର(ୟୁସିଏଚ୍ସି)ରେ ଯୋଗ ଇନଷ୍ଟ୍ରକଟର୍ ପଦବୀ ହିଁ ନାହିଁ । ଏବିଷୟରେ ସଚେତନ ନଥିବାରୁ ଲୋକେ ମଧ୍ୟ ଯୋଗାଭ୍ୟାସ କରିବାକୁ ସ୍ୱାସ୍ଥ୍ୟକେନ୍ଦ୍ରକୁ ଆସୁନାହାନ୍ତି ।
ସୂଚନା ଅନୁସାରେ, ବର୍ତ୍ତମାନ ଭୁବନେଶ୍ୱରରେ ୧୮ଟି ସହରାଞ୍ଚଳ ସ୍ୱାସ୍ଥ୍ୟ ଓ ଆରୋଗ୍ୟ କେନ୍ଦ୍ର(ୟୁଏଚ୍ଡବ୍ଲୁସି) ରହିଛି । ସେଥିମଧ୍ୟରୁ ୧୫ଟି କେନ୍ଦ୍ରରେ ଯୋଗ ଇନଷ୍ଟ୍ରକଟର ରହିଛନ୍ତି । ହେଲେ ପଳାଶୁଣି, ଆଚାର୍ଯ୍ୟବିହାର, ହଂସପାଳ ୟୁଏଚଡବ୍ଲୁସିରେ ଇନଷ୍ଟ୍ରକଟର ନଥିବାରୁ ସେଠାରେ ଯୋଗାଭ୍ୟାସ ହୋଇପାରୁନି । ତେବେ ଏହି ସ୍ୱାସ୍ଥ୍ୟକେନ୍ଦ୍ରମାନଙ୍କରେ ଯୋଗ ପାଇଁ ପର୍ଯ୍ୟାପ୍ତ ସ୍ଥାନ ନାହିଁ । ତେଣୁ ସେଠାରେ ଯୋଗାଭ୍ୟାସ ହୋଇପାରୁନି । କେବଳ ସେତିକିନୁହେଁ, ଭୁବନେଶ୍ୱରରେ ୟୁନିଟ-୪, ପଟିଆ, ଡୁମଡମା ଓ ବିଏମସି ହସ୍ପିଟାଲ ଭଳି ଚାରିଟି ସ୍ଥାନରେ ସହରାଞ୍ଚଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରହିଛି । ହେଲେ ଏସବୁ କେନ୍ଦ୍ରରେ ଆଦୌ ଯୋଗ ଇନଷ୍ଟ୍ରକଟର ନାହାନ୍ତି କିମ୍ବା ଯୋଗ କ୍ଲାସ ହେଉନି ।
ଅନ୍ୟପଟେ ସମୁଦାୟ ୨୨ଟି ସହରାଞ୍ଚଳ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରରେ ଯୋଗାଭ୍ୟାସ ପାଇଁ ନିୟମ ରହିଛି । ହେଲେ ବେଳେ ବେଳେ ସେଠାରେ ଲୋକ ନଥିବାରୁ ଯୋଗ କ୍ଲାସ ହୋଇପାରୁନି । ଅପରପକ୍ଷେ, ଭୀମଟାଙ୍ଗିରେ ଥିବା ଏକମାତ୍ର ସରକାରୀ ଆୟୁର୍ବେଦିକ ହସ୍ପିଟାଲରେ ଯୋଗଶ୍ରେଣୀ ବନ୍ଦ ରହିଛି । ଯୋଗ ଇନଷ୍ଟ୍ରକଟର ଅନ୍ୟତ୍ର ଯାଇ ଯୋଗ ଶିଖାଉଥିବା ଜଣାପଡ଼ିଛି । ରୋଗୀ ସମ୍ପର୍କୀୟଙ୍କ କହିବା କଥା, ହସ୍ପିଟାଲରେ ଯୋଗାଭ୍ୟାସ ପାଇଁ ସ୍ୱତନ୍ତ୍ର ସ୍ଥାନ ଦରକାର । ଚାରିପଟେ ଖୋଲା ସ୍ଥାନ ଥିଲେ ତାହା ଯୋଗାଭ୍ୟାସ ପାଇଁ ଏକ ପ୍ରକୃତ ପରିବେଶ ହୋଇପାରିବ । ହେଲେ ଅଧିକାଂଶ ହସ୍ପିଟାଲରେ ସେଭଳି ପରିବେଶ ନାହିଁ । ଏ ବାବଦରେ ଯୋଗ ବିଶେଷଜ୍ଞ ସୁରେଶ ମହାପାତ୍ର କହିଛନ୍ତି, ପ୍ରଥମ କଥା ହେଉଛି ହସ୍ପିଟାଲରେ ଯୋଗ ଶିବିର ହେଉଛି ବୋଲି ଲୋକଙ୍କୁ ସଚେତନ କରିବାକୁ ପଡ଼ିବ । ଯଦି ଯୋଗ ପାଇଁ ଭଲ ପରିବେଶ ନଥିବ ସେଭଳି ଏକ ପରିବେଶ ତିଆରି କରିବାକୁ ପଡ଼ିବ । ପରିବେଶ ନଥିବାରୁ ଲୋକେ ହସ୍ପିଟାଲ ଛାଡ଼ି ପାର୍କକୁ ଯାଇ ଯୋଗ କରୁଛନ୍ତି । ସ୍ୱାସ୍ଥ୍ୟ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି, ରାଜ୍ୟର ୪୨୨ଟି ଆୟୁଷ୍ମାନ ଆରୋଗ୍ୟ ମନ୍ଦିରରେ ଯୋଗ ଶିବିର ହେଉଛି । ହେଲେ ସରକାର ଏପର୍ଯ୍ୟନ୍ତ ୟୁସିଏଚସିରେ ଯୋଗ ପଦବି ସୃଷ୍ଟି କରିନାହାନ୍ତି ।
