ବେଗୁନିଆପଡା,୨୪।୬ : ଆସିକା- ଭୁବନେଶ୍ୱର ମୁଖ୍ୟ ରାସ୍ତାର ହାତତୋଟା ନିକଟରେ ଦୁଇ ମୋଟର ସାଇକେଲ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ୨ ଜଣ ଗୁରୁତର ଆହତ ହୋଇଛନ୍ତି। ସେମାନଙ୍କୁ ରାସ୍ତାରୁ ଉଦ୍ଧାର କରି ପୁରୁଷୋତ୍ତମପୁର ଏସ୍ଡ଼ିପିଓ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରିଥିଲେ। ସେଠାରୁ ଦୁଇ ଗୁରୁତରଙ୍କୁ ବ୍ରହ୍ମପୁର ବଡ଼ ମେଡିକାଲ ସ୍ଥାନାନ୍ତର କରାଯାଇଛି।
ମଙ୍ଗଳବାର ମଧ୍ୟାହ୍ନରେ ଭାଟକୁମୁରଡ଼ା ଗ୍ରାମର ସନ୍ୟାସୀ ଭୂୟାଁ ନିଜ ମୋଟର ସାଇକେଲ ଧରି ଗୁଡ଼ିଆଳି ଗ୍ରାମରୁ ଭୋଜିଖାଇ ଫେରୁଥିଲେ। ଏହି ସମୟରେ ତାରାତାରିଣୀ ରାସ୍ତା ଦେଇ ବିପରୀତ ପଟୁ ପୁସ୍ତପୁର ଗ୍ରାମର ଶତ୍ରୁଜିତ ଘୋଷ ନିଜ ଗ୍ରାମକୁ ମୋଟର ସାଇକେଲ ଯୋଗେ ଫେରୁଥିଲେ। ଭାରସାମ୍ୟ ହରାଇ ଦୁଇ ମୋଟର ସାଇକେଲ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା । ଏହି ସମୟରେ ପୁରୁଷୋତ୍ତମପୁର ଏସ୍ଡ଼ିପିଓ ଦୀପକ ମିଶ୍ର ଏହି ରାସ୍ତାଦେଇ ଯାଉଥିଲେ। ଗୁରୁତର ୨ ଜଣଙ୍କୁ ଉଦ୍ଧାର କରି କୋଦଳା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ପହଞ୍ଚାଇଥିଲେ । ପରେ ଉଭୟଙ୍କୁ ବ୍ରହ୍ମପୁର ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି ।
