ପୁରୀ, ୧୯/୦୬: ରଥର ପ୍ରଭା ନିର୍ମାଣ ଆରମ୍ଭ ହୋଇଛି । ରଥର ଏହା ଏକ ଆକର୍ଷଣୀୟ ଅଂଶ । ପ୍ରଭା ହେଉଛି ସିଂହାସନର ଏକ ଅଂଶ । ଶ୍ରୀବିଗ୍ରହ ପ୍ରଭାଙ୍କୁ ଆଉଜି ଅବସ୍ଥାନ କରିବେ । ବିଶ୍ୱକର୍ମା ଆଗେ ପ୍ରଭାର ଫ୍ରେମ୍ ତିଆରିବେ । ଏହାପରେ ରୁପକାରମାନେ ଏଥିରେ ରାହୁରୂପ ଓ ମଗରମୁଣ୍ଡ ଖୋଦେଇ କରିବେ । ଚିତ୍ରକର ସେବକ ଏହାକୁ ରଙ୍ଗ କଲା ପରେ ରଥରେ ଫିଟିଂ ହେବ । ପ୍ରଭା ପଛକୁ ଧୁଳିଦଣ୍ଡା ଲାଗିବ । ରଥରେ ମହାପ୍ରଭୁଙ୍କ ଅବସ୍ଥାନ ପାଇଁ ଚକା(ସିଂହାସନ ପିଣ୍ଡି) ତିଆରି ହେବ । ଠାକୁରେ ଚକା ସିଂହାସନରେ ବିଜେ ହେବେ । ସିଂହାସନ ପଛକୁ ରହିଥିବ ପ୍ରଭା ।
ରଥରେ ତାଗ ଓ ପଟା ବାଡ଼ିଆ ଯାଇଛି । ରଥର କୋଣକୁ ଛାଡ଼ି ପଟା ବାଡ଼ିଆ ଯାଉଛି । ଦୁଆରଘଡ଼ା ଟେକା ସରିଲେ ପଟା ବାଡ଼ିଆ ଶେଷ ହେବ । ଦୁଆରଘଡ଼ା ନିର୍ମାଣ କରୁଛନ୍ତି ବିଶ୍ୱକର୍ମା । ପ୍ରତି ରଥରେ ୪ଟି ଦୁଆରଘଡ଼ା ଲାଗିବ । ବୁଧବାର ରଥର ଗୋଟିଏ ଲେଖାଁଏ ଦୁଆରଘଡ଼ା ତିଆରି ସରିଲା । ଏଥିରେ ଚିତ୍ରକର ରଙ୍ଗ କରିବେ । ରଥରେ ପଛ କତରା ଲାଗିଛି । ଆଗ କତରାରେ ହାତୀ ମୁଣ୍ଡ ତିଆରି ହେଉଛି । ତିନି ରଥରେ ୫ଗୋଟି ଲେଖାଏଁ ଗୁଣ୍ଠି ଲାଗିବ । ରଥ ସମ୍ମୁଖ ଚାରପରିଛାକୁ ମୁଣ୍ଡାଇବା ପାଇଁ କାମରେ ଲାଗିବ । ତିନି ରଥର ଘୋଡ଼ା ସେଟିଂ ପାଇଁ ଇଶ ନିର୍ମାଣ ହେଉଛି ।
ରଥର ସୁରକ୍ଷା କବଚ କୋଣ ଗୁଜରେ ନୃସିଂହଙ୍କ ମୂର୍ତ୍ତିଙ୍କୁ ରଙ୍ଗ ଦେଇ ଜୀବନ୍ତ କରାଯାଉଛି । ଚିତ୍ରକରମାନେ ପାଶ୍ୱର୍ଦେବାଦେବୀ, ଓଲଟ ଶୁଆ, ହଂସପଟା ଆଦିରେ ରଙ୍ଗ କରୁଛନ୍ତି । ଦୋଳବେଦି ଅସ୍ଥାୟୀ କମାର ଶାଳରେ ଓଝା ସେବକମାନେ ତିନି ରଥର ଜଗତପୃଷ୍ଠ ଶେଣୀ କଣ୍ଟା ତିଆରୁଛନ୍ତି । ଦର୍ଜୀ ସେବକମାନେ ଶ୍ରୀମନ୍ଦିର କାର୍ଯ୍ୟାଳୟରେ ରଥ ମଣ୍ଡଣୀ ପାଇଁ କନାରେ ଲେସ୍ ଲଗାଉଛନ୍ତି । ତାଳଧ୍ୱଜର ମୁଖ୍ୟ ବିଶ୍ୱକର୍ମା ନରସିଂହ ମହାପାତ୍ର, ନନ୍ଦିଘୋଷର ମୁଖ୍ୟ ବିଶ୍ୱକର୍ମା ବିଜୟ କୁମାର ମହାପାତ୍ର ଓ ଦେବଦଳନର ମୁଖ୍ୟ ବିଶ୍ୱକର୍ମା ନାରାୟଣ ମହାରଣାଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ରଥ ନିର୍ମାଣ କାର୍ଯ୍ୟ ଆଗେଇ ଚାଲିଛି ।
