ବାଲିପାଟଣା, ୨୩/୦୬: ମୃତ ସ୍ୱାମୀଙ୍କ ଚକ୍ଷୁ ଦାନ କରିଛନ୍ତି ପତ୍ନୀ । ସ୍ୱାମୀ ଦେବେନ୍ଦ୍ର ସାହାଣୀ(୬୯)ଙ୍କ ଶେଷ ଇଚ୍ଛାକୁ ସମ୍ମାନ ଜଣାଇ ତାଙ୍କ ଦୁଇ ଚକ୍ଷୁକୁ ଦାନ କରିଥିବା କହିଛନ୍ତି ପତ୍ନୀ ଶୈଳବାଳା ।
ବାଲିପାଟଣା ଥାନା ସରାଟ ଗ୍ରାମରେ ଦେବେନ୍ଦ୍ର ସାହାଣୀ ଓରଫ ବିପଙ୍କ ଘର । ଝାରସୁଗୁଡା ଜିଲ୍ଲା ବେଲ ପାହାଡ଼ ବିଦ୍ୟୁତ୍ ବିଭାଗ ମୁଖ୍ୟ କାର୍ଯ୍ୟାଳୟରେ ଦୀର୍ଘ ବର୍ଷ କାର୍ଯ୍ୟ କରିବା ପରେ ୨୦୧୯ରେ ଅବସର ନେଇଥିଲେ ଦେବେନ୍ଦ୍ର । ଅବସର ପରେ ସପରିବାର ଉତ୍ତରା ଛକ ନିକଟରେ ରହୁଥିଲେ । ଗୁରୁବାର ପୂର୍ବାହ୍ନରେ ଦେବେନ୍ଦ୍ର ଅସୁସ୍ଥ ଅନୁଭବ କରିବାରୁ ତାଙ୍କୁ ପରିବାର ଲୋକେ ଭୁବନେଶ୍ୱରର ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲେ । ଅବସ୍ଥା ଅତି ଗୁରୁତର ହେବାରୁ ତାଙ୍କୁ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିଲା । ଡାକ୍ତର ସ୍ୱାସ୍ଥ୍ୟ ପରୀକ୍ଷା କରି ଦେବେନ୍ଦ୍ରଙ୍କୁ ମୃତ ଘୋଷଣା କରିଥିଲେ । ଶୈଳବାଳା ମୃତ ସ୍ୱାମୀ ଦେବେନ୍ଦ୍ରଙ୍କ ଚକ୍ଷୁ ଦାନ କରିବାକୁ ବିଭାଗୀୟ ଡାକ୍ତରମାନଙ୍କ ସହ ଯୋଗାଯୋଗ କରିଥିଲେ । ଶେଷରେ ବିଶେଷଜ୍ଞ ଡାକ୍ତରଙ୍କ ଦ୍ୱାରା ଦେବେନ୍ଦ୍ରଙ୍କ ଚକ୍ଷୁ ସଂଗ୍ରହ କରାଯାଇଥିଲା ।
