ନୂଆଦିଲ୍ଲୀ ୨୨/୦୬: ଅକ୍ଷୟ କୁମାରଙ୍କ ବହୁ ପ୍ରତୀକ୍ଷିତ ଫିଲ୍ମ ‘ହେରାଫେରି ୩’ ଅଧାରେ ଅଟକିଛି । ଫିଲ୍ମଟି ପୂରା ହୋଇପାରିବ କି ନାହିଁ ବର୍ତ୍ତମାନ କହି ହେଉନାହିଁ । ପରେଶ ରାୱଲ ଏହି ଫିଲ୍ମରୁ ନିଜକୁ ବାହାର କରିଆଣିବା ସହିତ ଅଗ୍ରୀମ ସମସ୍ତ ପ୍ରାପ୍ୟ ସୁଧ ସହିତ ଫେରସ୍ତ କରିଦେଇଛନ୍ତି । ଏବେ ଶୁଣିବାକୁ ମିଳିଛି ଅକ୍ଷୟଙ୍କ ଆଉ ଗୋଟିଏ ଫିଲ୍ମ ‘ୱେଲକମ୍ ୩’ ଯାହା ‘ୱେଲକମ୍ ଟୁ ଜଙ୍ଗଲ୍’ ନାମରେ ରିଲିଜ୍ ହୋଇଥାଆନ୍ତା, ତାହା ବି ସଂପୂର୍ଣ୍ଣ ହୋଇପାରିବ କି ନାହିଁ ସନ୍ଦେହ । କୁହାଯାଉଛି ଏଥିରେ ଅଭିନୟ କରିବାକୁ ଥିବା ଅଭିନେତା, ଅଭିନେତ୍ରୀମାନେ ନିଜର ସମସ୍ତ ପ୍ରାପ୍ୟ ପାଇବା ପରେ ଅଭିନୟ ଜାରି ରଖିବେ ବୋଲି କହିବାରୁ ଫିଲ୍ମଟି ସଂପୂର୍ଣ୍ଣ ହେବା ପାଇଁ ଆର୍ଥିକ ସମସ୍ୟା ଉପୁଜିଛି ।
‘ୱେଲକମ୍ ୩’ର ଏକ ବଡ଼ ଅଂଶର ସୁଟିଂ ଏବେ ବି ବାକି ଅଛି । ଶେଷଥର ପାଇଁ ଗତ ବର୍ଷ ଅଗଷ୍ଟ ମାସରେ ଏହି ଫିଲ୍ମର କିଛି ଦୃଶ୍ୟର ସୁଟିଂ କରାଯାଇଥିଲା । କିନ୍ତୁ ତାହା ପରଠାରୁ ଫିଲ୍ମର ପରବର୍ତ୍ତୀ ଅଂଶ କେବେ ଓ କେଉଁଠି ସୁଟ୍ କରାଯିବ କିଛି ନିଷ୍ପତ୍ତି ନିଆଯାଇପାରୁନି । ଏହି ଫିଲ୍ମ ପାଇଁ ଅକ୍ଷୟ କୁମାର ୮୦ ପ୍ରତିଶତ ଅର୍ଥ ବିନିଯୋଗ କରିଥିବା ବେଳେ ବାକି ୨୦ ପ୍ରତିଶତ ଫିରୋଜ ନାଡିୱାଦୱାଲା କରିଛନ୍ତି । ରିପୋର୍ଟ ଅନୁସାରେ ଏହି ଫିଲ୍ମରେ ଅଭିନୟ କରୁଥିବା ଅଭିନେତାମାନଙ୍କ ପ୍ରାପ୍ୟର ୧୦ ପ୍ରତିଶତ ବି ସେମାନଙ୍କୁ ମିଳିନି । ତେଣୁ ଅଭିନେତାମାନେ ବକେୟା ଅର୍ଥ ପାଇଁ ଦାବି କରୁଛନ୍ତି ।
‘ୱେଲକମ୍ ୩’ ଏକ ମଲ୍ଟିଷ୍ଟାରର୍ ମୁଭି । ଏଥିରେ ପ୍ରାୟ ୨୭ଜଣ ଅଭିନେତା, ଅଭିନେତ୍ରୀ ଅଭିନୟ କରିଥିବାରୁ ପ୍ରତ୍ୟେକଙ୍କ ପାଇଁ ସ୍କ୍ରିନ୍ ସ୍ପେସ୍ର ଅଭାବ ସମସ୍ୟା ସାଜିଛି । ଫିଲ୍ମଟିର ସୁଟିଂ ଅଧା ଥିବା ବେଳେ ଅକ୍ଷୟ ‘ହାଉସଫୁଲ୍ ୫’ର ସୁଟିଂ ସାରିଥିଲେ । ‘ହାଉସଫୁଲ୍ ୫’ ବକ୍ସ ଅଫିସରେ ଆଶାନୁରୂପ ପ୍ରଦର୍ଶନ କରିନି । ଏବେ ଅକ୍ଷୟ ‘ଭୂତ ବଂଗଲା’ ଏବଂ ଆଉ ଏକ ନୂଆ ପ୍ରୋଜେକ୍ଟ ପାଇଁ କାମ ଆରମ୍ଭ କରିଦେଇଛନ୍ତି । ତେବେ ଏହି ଦୁଇଟି ଫିଲ୍ମ ପାଇଁ ଅର୍ଥ ଏକ ବଡ଼ ସମସ୍ୟା ସାଜିଛି । ସିନେ ସମୀକ୍ଷକମାନେ କହୁଛନ୍ତି ଅକ୍ଷୟ ଏବେ ଅଧିକ ଫିଲ୍ମ ନ କରି କେବଳ ଅଭିନୟ ଉପରେ ଗୁରୁତ୍ୱ ଦେବା ଉଚିତ ।
