ନବରଙ୍ଗପୁର ୧୧/୬ : ଶ୍ଵଶୁର ହତ୍ୟାକାରୀ ଜ୍ଵାଇଁଙ୍କୁ ମିଳିଲା ଜେଲଦଣ୍ଡ । ଅଭିଯୁକ୍ତ ଜ୍ବାଇଁକୁ ଦୋଷୀ ସାବ୍ୟସ୍ତ କରିଛନ୍ତି ନବରଙ୍ଗପୁର ଜିଲ୍ଲା ଦୌରାଜଜ। ହତ୍ୟାକାରୀ ଜ୍ଵାଇଁକୁ ୫ ବର୍ଷ ଜେଲ ଦଣ୍ଡାଦେଶ ଶୁଣାଇଛନ୍ତି। ହତ୍ୟାକାରୀ ଜ୍ଵାଇଁ ଜଣକ ହେଉଛନ୍ତି କୋଷ।ଗୁମଡା ଥାନା ନୁନପାଣି ଗାଁର ଚୈତନ୍ୟ ଭତରା । ଏହି ମାମଲାରେ ୨୭ ଜଣ ସାକ୍ଷ୍ଯ ଓ ୨୮ଟି ଦସ୍ତାବିଜକୁ ଭିତ୍ତିକରି ଅଭିଯୁକ୍ତ ଚୈତନ୍ୟକୁ ହତ୍ୟା ଅଭିଯୋଗରେ ୫ ବର୍ଷ ସଶ୍ରମ କରାଦଣ୍ଡରେ ଦଣ୍ଡିତ କରିଛନ୍ତି। ଏହା ସହ ୫ ହଜାର ଜୋରିମାନା ଅଦାୟ କରିବାକୁ ନିର୍ଦେଶ ଦେଇଛନ୍ତି। ଅନାଦୟ କ୍ଷେତ୍ରରେ ୬ ମାସ ଅଧିକ ଜେଲ ଦଣ୍ଡ ଭୋଗିବାକୁ ନିର୍ଦେଶ ଦେଇଛନ୍ତି। ମାମଲା ପରିଚାଳନା କରୁଥିବା ପବ୍ଲିକ ପ୍ରସିକ୍ୟୁଟର ମନୋଜ କୁମାର ଏକ୍କାଙ୍କ ସୂଚନା ଅନୁଯାୟୀ, ନୁନପାଣି ଗାଁର ଚୈତନ୍ୟ ନେଙ୍ଗାନାଲ ଗ୍ରାମର ପର୍ଶୁରାମ ନାୟକଙ୍କ ଝିଅ ଦଶମୀଙ୍କୁ ବାହା ହୋଇ ଘର ଜ୍ବାଇଁ ହୋଇ ରହୁଥିଲା। ଗତ ୨୦୨୪ ଜୁଲାଇ ୭ ତାରିଖ ସନ୍ଧ୍ୟାରେ ଶ୍ଵଶୁର ପର୍ଶୁରାମ ଘର ବାରଣ୍ଡାରେ ବସିଥିବା ବେଳେ ଚୈତନ୍ୟ ହଠାତ ଆସି ତାଙ୍କୁ ଗାଳି ଗୁଲଜ କରିଥିଲା । ଏପରିକି ତଣ୍ଟି ଚିପି ଜୀବନରେ ମାରିବାକୁ ଉଦ୍ୟମ କରିଥିଲା । ଏହି ସମୟରେ ସ୍ତ୍ରୀ ଦଶମୀ ଓ ତାଙ୍କ ମାମୁଁ ନକୂଳ ଛଡ଼େଇବାକୁ ଚେଷ୍ଟା କରିଥିବା ବେଳେ ଚୈତନ୍ୟ ପର୍ଶୁରାମଙ୍କୁ ବାରଣ୍ଡା ତଳକୁ ଠେଲି ଦେଇଥିଲା। ଏହି ଠେଲା ପେଲାରେ ପର୍ଶୁରାମଙ୍କ ମୁଣ୍ଡ ପଛପଟ ଏକ ପଥରରେ ବାଜି ଘଟଣା ସ୍ଥଳରେ ଜୀବନ ଚାଲିଯାଇଥିଲା। ଏହି ଘଟଣାରେ ବାପାଙ୍କୁ ହତ୍ୟା କରିଥିବା ନିଜ ସ୍ବାମୀ ଚୈତନ୍ୟଙ୍କ ବିରୋଧରେ ଦଶମୀ କୋଷଗୁମୁଡା ଥାନାରେ ଏତଲା ଦେଇଥିଲେ। ଏତଲାକୁ ଭିତ୍ତିକରି ପୁଲିସ ଗିରଫ କରିଥିଲା। ଏହି ମାମଲାର ବିଚାର କରି ଜିଲ୍ଲା ଦୌରା ଜଜ ଅଭିଯୁକ୍ତଙ୍କୁ ଦଣ୍ଡିତ କରିବା ସହ ପୀଡିତ ପରିବାରକୁ କ୍ଷତିପୂରଣ ପ୍ରଦାନ କରିବାକୁ ଜିଲ୍ଲା ଆଇନ ସେବା ପ୍ରାଧିକରଣଙ୍କୁ ସୁପାରିଶ କରିଛନ୍ତି ।