ଚେନ୍ନାଇ: ଭାରତୀୟ ଜନତା ପାର୍ଟି (ବିଜେପି) ତାମିଲନାଡୁରେ ୨୦୨୬ ବିଧାନସଭା ନିର୍ବାଚନ ରଣନୀତି ଆରମ୍ଭ କରିଛି। ମଦୁରାଇ ଗସ୍ତରେ ଥିବା କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଷ୍ଟାଲିନ ସରକାରଙ୍କ ଉପରେ ବର୍ଷିଛନ୍ତି । ସେ କହିଛନ୍ତି ଯେ, ୨୦୨୬ରେ ତାମିଲନାଡୁରେ ବିଜେପି-ଏଆଇଏଡିଏମକେ ମେଣ୍ଟର ଏନଡିଏ ସରକାର ଗଠନ ହେବ। ମୁଁ ଦିଲ୍ଲୀରେ ରହେ, କିନ୍ତୁ ମୋର କାନ ସବୁବେଳେ ତାମିଲନାଡୁ ଉପରେ ଥାଏ । ଏମକେ ଷ୍ଟାଲିନ କହିଛନ୍ତି ଯେ, ଅମିତ ଶାହ ଡିଏମକେକୁ ପରାସ୍ତ କରିପାରିବେ ନାହିଁ। ସେ ଠିକ୍ କହୁଛନ୍ତି। ମୁଁ ନୁହେଁ, ତାମିଲନାଡୁର ଲୋକମାନେ ଆପଣଙ୍କୁ ପରାସ୍ତ କରିବେ। ସେ ଦାବି କରିଛନ୍ତି ଯେ, ୨୦୨୬ ନିର୍ବାଚନରେ ତାମିଲନାଡୁ ଏବଂ ପଶ୍ଚିମବଙ୍ଗରେ ଏନଡିଏ ସରକାର ଗଠନ ହେବ।

 କେନ୍ଦ୍ର ଗୃହମନ୍ତ୍ରୀ ଏବଂ ବରିଷ୍ଠ ବିଜେପି ନେତା ଅମିତ ଶାହ ଶନିବାର ବିଳମ୍ବିତ ସନ୍ଧ୍ୟାରେ ତାମିଲନାଡୁର ମଦୁରାଇରେ ପହଞ୍ଚିଥିଲେ। ଯେଉଁଠାରେ ସେ ମୀନାକ୍ଷୀ ମନ୍ଦିରରେ ପ୍ରାର୍ଥନା କରିବା ପରେ ଦଳର କୋର କମିଟି ବୈଠକର ଅଧ୍ୟକ୍ଷତା କରିଥିଲେ। ଏହି ବୈଠକରେ ସେ ଆଗାମୀ ନିର୍ବାଚନରେ ଡିଏମକେ ବିରୋଧରେ ବିଜେପିର ରଣନୀତି ବିଷୟରେ ବିସ୍ତୃତ ଆଲୋଚନା କରିଥିଲେ ।

 ମଦୁରାଇରେ ପହଞ୍ଚିବା ପରେ, ବିଜେପି ନେତା ତାମିଲିସାଇ ସୌନ୍ଦରାରାଜନ, ତାମିଲନାଡୁ ରାଜ୍ୟ ସଭାପତି ନୈନାର ନାଗେନ୍ଦ୍ରନ ଏବଂ ଅନ୍ୟାନ୍ୟ ବରିଷ୍ଠ ନେତାମାନେ ଅମିତ ଶାହଙ୍କୁ ସ୍ବାଗତ କରିଥିଲେ । ଶାହ ରବିବାର ପ୍ରସିଦ୍ଧ ମୀନାକ୍ଷୀ ଅମ୍ମାନ ମନ୍ଦିର ପରିଦର୍ଶନ କରି ତାଙ୍କର ଗସ୍ତ ଆରମ୍ଭ କରିଥିଲେ। ପରେ ସୋସିଆଲ ମିଡିଆ ପ୍ଲାଟଫର୍ମ X (ପୂର୍ବରୁ ଟ୍ବିଟର)ରେ ଏକ ପୋଷ୍ଟରେ ସେ ଲେଖିଛନ୍ତି, ଆଜି ମୋତେ ମଦୁରାଇର ପ୍ରତିଷ୍ଠିତ ମୀନାକ୍ଷୀ ଅମ୍ମାନ ମନ୍ଦିରରେ ପୂଜା କରିବାର ସୌଭାଗ୍ୟ ମିଳିଛି। ମୁଁ ରାଷ୍ଟ୍ରର ନିରନ୍ତର ପ୍ରଗତି ଏବଂ ଆମର ନାଗରିକଙ୍କ ମଙ୍ଗଳ ପାଇଁ ମା'ଙ୍କ ଆଶୀର୍ବାଦ ଲୋଡ଼ିଛି ।

 ମଦୁରାଇରେ ଅନୁଷ୍ଠିତ ବିଜେପିର ରାଜ୍ୟ କୋର କମିଟି ବୈଠକରେ ଅମିତ ଶାହ ଡିଏମକେ ସରକାରଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି ଯେ, ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ନେତୃତ୍ବାଧୀନ ଡିଏମକେ ସରକାରଙ୍କ ବ୍ୟାପକ ଦୁର୍ନୀତିରେ ତାମିଲନାଡୁର ଲୋକମାନେ ଅସ୍ତବ୍ୟସ୍ତ। ସେ ଦାବି କରିଥିଲେ ଯେ, ରାଜ୍ୟବାସୀ ଏବେ ପରିବର୍ତ୍ତନ ଚାହୁଁଛନ୍ତି ଏବଂ ବିଜେପିକୁ ଏକ ବିକଳ୍ପ ଭାବରେ ଦେଖୁଛନ୍ତି ।