ଭୁବନେଶ୍ୱର, ୦୬/୦୫ : ଆଜି ସାବିତ୍ରୀ ଅମାବାସ୍ୟା। ଓଡ଼ିଆ ଘରର ପରମ୍ପରା ଅନୁସାରେ ବିବାହିତ ମହିଳାମାନେ ସ୍ୱାମୀଙ୍କ ଦୀର୍ଘାୟୁ କାମନା କରି ସାବିତ୍ରୀ ବ୍ରତ ପାଳନ କରନ୍ତି। ସ୍ୱାସ୍ଥ୍ୟ ଓ ନିରାମୟ ଜୀବନ କାମନା କରି ସଧବା ନାରୀମାନେ ଜ୍ୟେଷ୍ଠ ମାସ ଅମାବାସ୍ୟାରେ ସାବିତ୍ରୀ ବ୍ରତ ପାଳନ କରନ୍ତି। ହିନ୍ଦୁ ମହିଳାମାନେ ପ୍ରତିବର୍ଷ ଏହି ଦିନକୁ ବଡ଼ ଉତ୍ସାହର ସହିତ ଅପେକ୍ଷା କରିଥାନ୍ତି । ପରମ୍ପରା ଅନୁସାରେ ଓଷା ପାଇଁ ମହିଳାମାନେ ନୂଆ ଶାଢ଼ୀ, ଚୁଡ଼ି, ଫଳମୂଳ, ପୂଜା ସାମଗ୍ରୀ ଧରି ମନ୍ଦିର ଯାଇ ପୂଜାର୍ଚ୍ଚନା କରନ୍ତି । କେହି କେହି ଘରେ ବ୍ରାହ୍ମଣଙ୍କୁ ଡାକି ପୂଜା କରନ୍ତି ।
ସକାଳୁ ସାବିତ୍ରୀମାନେ ଥାଳିରେ ପୂଜା ସାମଗ୍ରୀ ସଜାନ୍ତି। ଶଙ୍ଖା, ସିନ୍ଦୁର, ସାଲୁକନା, ନାଲି ଚୁଡ଼ି, କଳା ଚୁଡି, ବ୍ରତ, ତୁଳା, କଳାମାଳି, କାଠ, ପାନିଆ, ପାଟ ଫୁଲି, ମଥା ବାସ, ଦର୍ପଣ ପରି ସମସ୍ତ ଜିନିଷ ପୂଜା ଲାଗି ଦରକାର ହେଇଥାଏ। ଆଜି ପୂଜା ଲାଗି ବ୍ୟବହାର ହେବାକୁ ଥିବା କଳା ଓ ନାଲି ଚୁଡି ୨ଟାକୁ ୫ଟଙ୍କା ଅଳତା ୧୦ଟଙ୍କା, ଗୁଆ ୩ଟଙ୍କା, ବ୍ରତ ୩ଟଙ୍କା, ସିନ୍ଦୁର ଫରୁଆ ୫ରୁ ୧୦ଟଙ୍କା, ଅଇନା ୩ଟଙ୍କା, ହରିଡା, ବାହାଡା ୩ଟଙ୍କା, ପାନିଆ ୧୦ଟଙ୍କା ଦାମ୍ ରହିଛି । କିଛି ବୋପାରୀ ପଲିଥିନ୍ରେ ସବୁ ସାମଗ୍ରୀ ପ୍ୟାକ କରି ଧରାଇ ଦେଇ ଏକ ପ୍ରକାରର ଦାମ୍ ସ୍ଥିର କର ଦେଇଛନ୍ତି । ସବୁ ପୁଜା ସମାଗ୍ରୀ ଥିବା ପୁଟୁଳି ଦାମ୍ ୧୦୦ଟଙ୍କା ରହିଛି ।
ସଧବା ନାରୀଙ୍କର ବିଶ୍ୱାସ ରହିଛି ଯେ, ସାବିତ୍ରୀ ବ୍ରତ ଦିନ ଜଣେ ନାରୀ, କିନ୍ନର ଦିଦିମାନେ ପୂଜା କରିଥିବା ଭୋଗ ସେବନ କଲେ କିମ୍ବା ଶଙ୍ଖା ସିନ୍ଦୂରକୁ ପରିଧାନ କଲେ ତାଙ୍କ ସ୍ୱାମୀ ଦୀର୍ଘାୟୁ ହୋଇଥାନ୍ତି। କେବଳ ସେଥିପାଇଁ କିଛି ସଧବା ମହିଳା କିନ୍ନର ପୂଜା କରୁଥିବା ସ୍ଥାନକୁ ଯାଇ ସେଠାରେ ସେମାନଙ୍କର ଆଶୀର୍ବାଦ କାମନା କରିବା ସହ ଶଙ୍ଖା, ସିନ୍ଦୂର ମାଗିଥାନ୍ତି ।
