ନୂଆଦିଲ୍ଲୀ: ପାକିସ୍ତାନ ଭାରତ ଉପରେ କରିଥିବା ଆତଙ୍କବାଦୀ ଆକ୍ରମଣର ପର୍ଦ୍ଦାଫାଶ କରିବା ପାଇଁ ଏକ ସର୍ବଦଳୀୟ ଭାରତୀୟ ପ୍ରତିନିଧି ଦଳ ଏବେ ବିଦେଶ ଗସ୍ତରେ ଅଛନ୍ତି। ୭ଟି ପ୍ରତିନିଧି ଦଳ ମଧ୍ୟରୁ ଗୋଟିଏର ନେତୃତ୍ୱ ବରିଷ୍ଠ କଂଗ୍ରେସ ନେତା ତଥା କେରଳ ସାଂସଦ ଶଶି ଥରୁର ନେଉଛନ୍ତି। ବ୍ରାଜିଲରେ ପହଞ୍ଚିଥିବା ଶଶି ଥରୁରଙ୍କୁ ଯେତେବେଳେ କଂଗ୍ରେସ ନେତା ମାନେ କରୁଥିବା ସମାଲୋଚନା ବିଷୟରେ ପଚରାଗଲା, ଥରୁର କହିଥିଲେ ଯେ ମୁଁ ଭାବୁଛି ଏବେ ଆମ ମିଶନ ଉପରେ ଧ୍ୟାନ ଦେବାର ସମୟ ଆସିଛି।
ଯେତେବେଳେ ଗଣମାଧ୍ୟମ କଂଗ୍ରେସ ନେତାମାନଙ୍କ ବିଷୟରେ ପଚାରିଲା, ଥରୁର କହିଥିଲେ ଯେ, ନିସନ୍ଦେହରେ ଏକ ସମୃଦ୍ଧ ଗଣତନ୍ତ୍ରରେ ମନ୍ତବ୍ୟ ଏବଂ ସମାଲୋଚନା ହେବା ନିଶ୍ଚିତ, କିନ୍ତୁ ମୁଁ ଭାବୁଛି ଆମେ ବର୍ତ୍ତମାନ ସେହି ଜିନିଷ ଗୁଡ଼ିକ ଉପରେ ଧ୍ୟାନ ଦେଇପାରିବୁ ନାହିଁ।
ସେ କହିଥିଲେ ଯେ ଯେତେବେଳେ ଆମେ ଭାରତ ଫେରିବୁ, ଆମେ ନିଶ୍ଚିତ ଭାବରେ ଆମର ସହକର୍ମୀ,ସମାଲୋଚକ ଏବଂ ଗଣମାଧ୍ୟମ ପ୍ରତିନିଧି ମାନଙ୍କ ସହିତ କଥା ହେବାର ସୁଯୋଗ ପାଇବୁ, କିନ୍ତୁ ବର୍ତ୍ତମାନ ଆମେ ଯେଉଁ ଦେଶ ଗୁଡ଼ିକୁ ଯାଉଛୁ ସେଠାରେ ଆମେ ଆମର ବାର୍ତ୍ତା ନେଇଯାଉଛୁ। ପାକିସ୍ତାନ ସହିତ ଉତ୍ତେଜନା ସମ୍ପର୍କରେ ଶଶି ଥରୁର ବିଦେଶରେ ଭାରତକୁ ଦୃଢ଼ ଭାବରେ ପ୍ରତିନିଧିତ୍ୱ କରୁଛନ୍ତି, ଯାହା ଯୋଗୁଁ ସମାଲୋଚକ ମାନେ ମଧ୍ୟ ତାଙ୍କର ପ୍ରଶଂସକ ହୋଇଯାଇଛନ୍ତି। ତଥାପି, ଅନେକ କଂଗ୍ରେସ ନେତା ଏହାକୁ ପସନ୍ଦ କରୁନାହାଁନ୍ତି।
ପହଲଗାମ ଆତଙ୍କବାଦୀ ଆକ୍ରମଣ ପରେ କଂଗ୍ରେସ ମୋଦି ସରକାରଙ୍କୁ ପୂର୍ଣ୍ଣ ସମର୍ଥନ ଦେବାକୁ ଘୋଷଣା କରିଥିଲା, କିନ୍ତୁ ଏବେ କଂଗ୍ରେସର ମନୋଭାବ ବଦଳି ଯାଇଛି। କଂଗ୍ରେସ ଯୁଦ୍ଧବିରତିକୁ ନେଇ ସରକାରଙ୍କ ଉପରେ ପ୍ରଶ୍ନ ଉଠାଉଛି ଏବଂ ଆମେରିକାର ଭୂମିକା ବିଷୟରେ ମଧ୍ୟ ପ୍ରଶ୍ନ କରିବା ଆରମ୍ଭ କରିଛି । ଅପରେସନ ସିନ୍ଦୁର ସମ୍ପର୍କରେ ଶଶି ଥରୁର ସରକାରଙ୍କୁ ସମର୍ଥନ କରିବା ଏବଂ ପରେ ତାଙ୍କୁ ଭାରତୀୟ ପ୍ରତିନିଧିମଣ୍ଡଳର ନେତୃତ୍ୱ ନେବା ପାଇଁ ବାଛିବା କଂଗ୍ରେସର ଏକ ଗୋଷ୍ଠୀକୁ ପସନ୍ଦ ଆସିନଥିଲା।
