ବାହାଡ଼ାଝୋଲା, ୫।୬ : ନୟାଗଡ଼ ଜିଲ୍ଲା ନୂଆଗାଁ ବ୍ଲକ ଅନ୍ତର୍ଗତ ବେରୁଆବାରୀ ପଂଚାୟତର ତୋରି ଗାଡିଆ ଗ୍ରାମରେ କୃଷ୍ଣ ଚନ୍ଦ୍ର ସାହୁଙ୍କ ଦୋକାନରେ ଦିଆଯାଇଥିବା ଧୂପରୁ ଲାଗିଲା ନିଆଁ । ଏଥିରେ ଜଣେ ଗୁରୁତର ହୋଇଥିବା ବେଳେ ଦୋକାନ ସମ୍ପୂର୍ଣ୍ଣ ପୋଡ଼ି ପାଉଁଶ ହୋଇଯାଇଛି।
ନୂଆଗାଁ ବ୍ଲକ ଅନ୍ତର୍ଗତ ବେରୁଆବାରୀ ପଂଚାୟତର ତୋରି ଗାଡିଆ ଗ୍ରାମରେ କୃଷ୍ଣ ଚନ୍ଦ୍ର ସାହୁଙ୍କ ଦୋକାନରେ ପ୍ରତ୍ୟେକ ଦିନ ପରି ସକାଳ ଓ ସନ୍ଧ୍ୟା ସମୟରେ ଧୁପ ଦିଅନ୍ତି । ସ୍ତ୍ରୀ ଅହଲ୍ୟା ସାହୁ ଦୋକାନରେ ଧୁପ ଦେଇ ବେପାର କରୁଥିବା ବେଳେ ଧୁପ ନିଆଁ ପଡି ଦୋକାନ ଜଳିଥିଲା। ଏହା ଦେଖି କିଛି ଜିନିଷ ଉଦ୍ଧାର କରିବା ସମୟରେ ନିଜେ ପୋଡି ହୋଇଯାଇଥିଲେ। ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ଉଦ୍ଧାର କରାଯାଇଥିଲା।
ଏଥିରେ ଅହଲ୍ୟାଙ୍କ ଦୁଇ ହାତ ଦୁଇ ଗୋଡ଼ ପୋଡ଼ି ହୋଇଯାଇଛି । ତାଙ୍କୁ ନୟାଗଡ଼ ଜିଲ୍ଲା ହସ୍ପିଟାଲରେ ଭର୍ତ୍ତି କରିଥିଲେ । ଓଡ଼ଗାଁ ଦମକଳ ବାହିନୀ ଘଟଣାସ୍ଥଳରେ ପହଂଚି ନିଆଁକୁ ଆୟତ୍ତ କରିଥିବା ବେଳେ ବାହାଡ଼ା ଝୋଲା ଆରଆଇ ପହଞ୍ଚି କ୍ଷୟକ୍ଷତି ଆକଳନ କରିବା ସହିତ ତଦନ୍ତ କରିଛନ୍ତି। ଗ୍ରାମାଞ୍ଚଳରେ ବ୍ୟବସାୟ କରି ପରିବାର ପୋଷଣ କରୁଥିବା ଗରିବ କୃଷ୍ଣ ଚନ୍ଦ୍ର ସାହୁଙ୍କୁ ସରକାରୀ ସହାୟତା ଯୋଗାଇ ଦେବାପାଇଁ ଗ୍ରାମବାସୀ ଅନୁରୋଧ କରିଛନ୍ତି।
