କୋଲକାତା,୦୭/୦୬: ପହଲଗାମ ଆତଙ୍କୀ ଆକ୍ରମଣର ପ୍ରତିଶୋଧ ନେବାକୁ ଭାରତୀୟ ସେନା ଅପରେସନ୍ 'ସିନ୍ଦୂର' ଲଞ୍ଚ କରିଥିଲା । ଏହାକୁ ନେଇ ତୃଣମୂଳ କଂଗ୍ରେସ ବିଧାୟକ (ଟିଏମସି) ନରେନ୍ଦ୍ରନାଥ ଚକ୍ରବର୍ତ୍ତୀ ଦେଇଥିବା ବିୟାନକୁ ନେଇ ବିବାଦ ଉପୁଜିଛି । ଅପରେସନ୍ ସିନ୍ଦୂର ନାଟକ ଥିଲା ଏହା ପାକିସ୍ତାନ ସହ ଡିଲ ଥିଲା ବୋଲି କହିଛନ୍ତି ବିଧାୟକ ନରେନ୍ଦ୍ରନାଥ । ଏହାକୁ ନେଇ ରାଜନୈତିକ ବୟାନବାଜି ଆରମ୍ଭ ହୋଇଛି । ବିଧାୟକ ନରେନ୍ଦ୍ରନାଥ ଚକ୍ରବର୍ତ୍ତୀଙ୍କ ନାମରେ ମାମଲା ରୁଜ୍ଜୁ କରିଛି ବିଜେପି । ଏହି ମାମଲାରୁ ଟିଏମ୍ସି ନିଜକୁ ଦୂରେଇ ରଖିଛି । ବିଧାୟକଙ୍କର ଏହା ବ୍ୟକ୍ତିଗତ ବୟାନ ବୋଲି କହିଛି ଦଳ ।
କଣ କହିଥିଲେ ଟିଏମ୍ସି ବିଧାୟକ- ଏକ କାର୍ଯ୍ୟକ୍ରମକୁ ଟିଏମ୍ସି ବିଧାୟକ ନରେନ୍ଦ୍ରନାଥ ଚକ୍ରବର୍ତ୍ତୀ ଅପରେସନ ସିନ୍ଦୂରକୁ ଏକ ନାଟକ ବୋଲି କହିଥିଲେ । ଏହା ବିଜେପି ଦ୍ୱାରା ଆରମ୍ଭ ହୋଇଥିବା ଏକ ଯୁଦ୍ଧ ଅଭଯାନ ଥିଲା । ସେମାନେ (ବିଜେପି) ଯେଉଁଭଳି ସିନ୍ଦୂର ଖେଳ ଆରମ୍ଭ କରିଛନ୍ତି ଲାଗୁଛି ତାହା ପୂରା ନାଟକ ଥିଲା । ପାକିସ୍ତାନ ସହ ଡିଲ୍ ଥିଲା । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଉପରେ ଦେଶଭକ୍ତ ଲୋକଙ୍କ ଭାବନା ସହ ଖେଳିଥିବା ଅଭିଯୋଗ କରିଥିଲେ । ବିଧାୟକଙ୍କର ଏହି ବୟାନକୁ ନେଇ ଭଡ଼କି ଥିଲା ବିଜେପି । ଏନଆଇଏ ତଦନ୍ତ ଦାବି କରିଛି ଭାରତୀୟ ଜନତା ପାର୍ଟି ।
ବିଜେପି ବିରୋଧୀ ଦଳ ନେତା ଶୁଭେନ୍ଦୁ ଅଧିକାରୀ କହିଛନ୍ତି,'' ଟିଏମ୍ସି ବିଧାୟକ ନରେନ୍ଦ୍ରନାଥ ଚକ୍ରବର୍ତ୍ତୀ ଦେଇଥିବା ବୟାନ ଅନେକ ପ୍ରଶ୍ନ ସୃଷ୍ଟି କରୁଛି । ଯାହାକୁ ଅଣଦେଖା କରାଯାଇପାରିବ ନାହିଁ । ଏହିପରି ବୟାନକୁ ନେଇ ତୁରନ୍ତ ତଦନ୍ତ କରାଯାଉ ।''
ଅଧିକ ପଢନ୍ତୁ...ପ୍ରଧାନମନ୍ତ୍ରୀଙ୍କ ସହ କଥା ହେଲେ କାନାଡା ପିଏମ୍, ଜି-୭ ସମିଟ୍କୁ କଲେ ଆମନ୍ତ୍ରଣ
ନରେନ୍ଦ୍ରନାଥ ଚକ୍ରବର୍ତ୍ତୀଙ୍କ ବୟାନକୁ ନେଇ ଟିଏମ୍ସି ନିଜକୁ ଦୂରେଇ ରଖିଛି । ଟିଏମ୍ସି ମୁଖପାତ୍ର କୁନାଲ ଘୋଷ କହିଛନ୍ତି,''ଏହା ତାଙ୍କର ବ୍ୟକ୍ତିଗତ ବୟାନ । ଶାସକ ଦଳ ଏହାର ସମର୍ଥନ କରେନାହିଁ । ତାଙ୍କ ସହିତ ଯୋଗାଯୋଗ କରିବାକୁ ଚେଷ୍ଟା କରିଥିଲୁ କିନ୍ତୁ ତାହା ସମ୍ଭବ ହୋଇପାରିନଥିଲା ।''
ସଫେଇ ଦେଲେ ବିଧାୟକ ନରେନ୍ଦ୍ରନାଥ- ଅପରେସନ୍ ସିନ୍ଦୂରକୁ ନେଇ ଦେଇଥିବା ବୟାନ ପରେ ବୋବାଲ ହେବାପରେ ସଫେଇ ଦେଇ ବିଧାୟକ ନରେନ୍ଦ୍ରନାଥ ଚକ୍ରବର୍ତ୍ତୀ କହିଛନ୍ତି, ''ରାଜନୈତିକ ଉଦ୍ଦେଶ୍ୟ ପାଇଁ ବୟାନକୁ ଭୁଲ ଭାବରେ ଉପସ୍ଥାପନ କରାଯାଉଛି । ମୁଁ ଭାରତୀୟ ସେନା ସମେତ ଆମ ସୁରକ୍ଷାବଳକୁ ସମ୍ମାନ ଦିଏ । ମୋତେ ଏବଂ ମୋ ଦଳକୁ ଅପମାନିତ କରିବାକୁ ରାଜନୈତିକ ଉଦ୍ଦେଶ୍ୟ ପାଇଁ ମୋ ଭାଷଣର କିଛି ଅଂଶକୁ ଭୁଲ ଭାବେ ପ୍ରସାରିତ କରାଯାଉଛି ।''
