ନୂଆଦିଲ୍ଲୀ,୨୨/୦୫:କୁଆପଥର ମାଡ଼ରେ ଇଣ୍ଡିଗୋ ବିମାନ କ୍ଷତିଗ୍ରସ୍ତ। ନୂଆଦିଲ୍ଲୀରୁ ଶ୍ରୀନଗର ଅଭିମୁଖେ ଯାଉଥିବା ଇଣ୍ଡିଗୋ ବିମାନ ଗତକାଲି ଖରାପ ପାଗ ସହିତ ପ୍ରବଳ କୁଆପଥର ବର୍ଷାର ସମ୍ମୁଖୀନ ହୋଇଥିଲା। କୁଆପଥର ମାଡ଼ରେ ବିମାନର ସମ୍ମୁଖ ଅଂଶ କ୍ଷତିଗ୍ରସ୍ତ ହୋଇଥିଲା । ଯାହାକୁ ନେଇ ବିମାନ ଶ୍ରୀନଗରରେ ଜରୁରୀ ଅବତରଣ କରିଥିବା ଜଣାପଡ଼ିଛି।
ତେବେ ୨୨୭ ଜଣ ଯାତ୍ରୀଙ୍କୁ ନେଇ ଯାଉଥିବା ବିମାନଟି କାଶ୍ମୀର ଉପତ୍ୟକା ନିକଟରେ ପହଞ୍ଚିବା ସମୟରେ ପ୍ରତିକୂଳ ପାଣିପାଗର ସମ୍ମୁଖୀନ ହୋଇଥିଲା। ଅଶାନ୍ତ ପାଗ ଯୋଗୁଁ ଶ୍ରୀନଗରସ୍ଥିତ ଏୟାର ଟ୍ରାଫିକ୍ କଣ୍ଟ୍ରୋଲ କୁ ପାଇଲଟ ଜରୁରୀସ୍ଥିତି ଘୋଷଣା କରବାକୁ ବାର୍ତ୍ତା ପଠାଇଥିଲେ। ଅଧିକାରୀମାନେ କହିଛନ୍ତି ଯେ ଆହ୍ୱାନପୂର୍ଣ୍ଣ ପରିସ୍ଥିତି ସତ୍ତ୍ୱେ ବିମାନଟି ସନ୍ଧ୍ୟା ସାଢ଼େ ୬ଟାରେ ଶ୍ରୀନଗର ଅନ୍ତର୍ଜାତୀୟ ବିମାନବନ୍ଦରରେ ସୁରକ୍ଷିତ ଅବତରଣ କରିବାରେ ସଫଳ ହୋଇଛି। ଇଣ୍ଡିଗୋର ବିବୃତିରେ କୁହାଯାଇଛି ଯେ କୁଆପଥର ମାଡ଼ର ସମ୍ମୁଖୀନ ହେବାପରେ ବିମାନର କେବିନ୍ କ୍ରୁ ପ୍ରୋଟୋକଲ୍ ଅନୁସରଣ କରିଥିଲେ । ଏହାସହିତ ବିମାନର ସୁରକ୍ଷିତ ଅବତରଣ ସମ୍ଭବ ହୋଇଥିଲା। ଆଉ ଏହାରି ମଧ୍ୟରେ କ୍ୟାବିନ୍ ଭିତରୁ ଭାଇରାଲ ହେଉଛି ଭିଡ଼ିଓ । ଯେଉଁଥିରେ ଅଶାନ୍ତ ସ୍ଥିତି ଦେଖିବାକୁ ମିଳିଛି। ଏଥିରେ କୌଣସି କ୍ଷୟକ୍ଷତି ହୋଇନଥିଲେ ମଧ୍ୟ ଯାତ୍ରୀମାନେ ଭୟଭୀତ ଅବସ୍ଥାରେ ଥିବା ଦେଖିବାକୁ ମିଳିଥିଲା।
