କୋରାପୁଟ,୦୫/୦୬: କୋରାପୁଟର ସହିଦ ଲକ୍ଷ୍ମଣ ନାୟକ ମେଡିକାଲ କଲେଜ ଏବଂ ହସ୍ପିଟାଲରେ ଭୁଲ୍ ଇଞ୍ଜେକସନ୍ ଯୋଗୁଁ ବୁଧବାର ୬ଜଣଙ୍କ ମୃତ୍ୟୁ ହୋଇଛି । ଏହାର ତଦନ୍ତ ପାଇଁ ଆଜି ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗ ମେଡିକାଲ୍ କଲେଜ୍ ପରିଦର୍ଶନ କରିବାକୁ ଯାଇଥିଲେ । ସେଠାରେ ବିଭିନ୍ନ ଓ୍ବାର୍ଡ ବୁଲିବା ଦେଖିବା ସହିତ କିଭଳି ମୃତ୍ୟୁ ହେଲା ତା’ର ସମୀକ୍ଷା କରିଛନ୍ତି । ତେବେ ମନ୍ତ୍ରୀଙ୍କ ପରିଦର୍ଶନ ବେଳେ କଂଗ୍ରେସ କର୍ମୀମାନେ ବିକ୍ଷୋଭ ପ୍ରଦର୍ଶନ କରିଥିଲେ ।
କଂଗ୍ରେସର ପୂର୍ବତନ ବିଧାୟକ ନିମାଇ ସରକାର, ପୂର୍ବତନ ନଗରପାଳ ଭଗବାନ ବାହିନୀପତି ଏବଂ ରୂପକ ତୁରୁକ ପ୍ରମୁଖ ସ୍ବାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗଙ୍କୁ ମେଡିକାଲ କଲେଜରେ ଥିବା ସମସ୍ୟାର ଦୁଷ୍ଟି ଆକର୍ଷଣ କରିବାକୁ ଚାହୁଁଥିଲେ । ସେମାନଙ୍କର ମୁଖ୍ୟ ଦାବିଥିଲା, ଭୁଲ୍ ଇଞ୍ଜେକସନରେ ପ୍ରାଣ ହରାଇଥିବା ମୃତକଙ୍କ ପରିବାରକୁ ୨୫ ଲକ୍ଷ ଟଙ୍କା ଲେଖାଏଁ ସହାୟତା ପ୍ରଦାନ କରିବା । ସେହିପରି ମେଡିକାଲ କଲେଜ ଓ ହସ୍ପିଟାଲରେ ଖାଲି ପଡ଼ିଥିବା ଡିନ୍ ଓ ଡାକ୍ତର ପଦବୀ ପୂରଣ ପାଇଁ ଦାବି କରିବା । ଏହାଛଡ଼ା ଯେଉଁ ବିଶେଷଜ୍ଞ ଡାକ୍ତର ମାନେ ଅଧା ଦିନ ରହୁନାହାନ୍ତି ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଭଳି ପ୍ରସଂଗ ରହିଥିଲା । ଆଗାମୀ ଦିନରେ ମେଡିକାଲ କଲେଜ ସମସ୍ୟାର ସ୍ଥାୟୀ ପ୍ରତିକାର ନହେଲେ ଜୋରଦାର୍ ଆନ୍ଦୋଳନ ହେବା ବୋଲି କଂଗ୍ରେସ ନେତା ଓ କର୍ମୀମାନେ କହିଛନ୍ତି ।
