କୋକସରା,୧୨/୦୬: କଳାହାଣ୍ଡି ଜିଲ୍ଲା କୋକସରା ବ୍ଲକ ସାନ ପୋଡ଼ାଗୁଡା ପଞ୍ଚାୟତ ସାନ ପୋଡ଼ାଗୁଡା କଲ୍ୟାଣି ସ୍ୱୟଂ ସହାୟକ ଗୋଷ୍ଠୀର ସଭାପତି ଓ ସମ୍ପାଦିକା ଗୋଷ୍ଠିର ଅନ୍ୟ ସଦସ୍ୟାଙ୍କୁ ଭୁଆଁ ବୁଲାଇ ସେମାନଙ୍କ ଅଜାଣତରେ ୧୪ ଲକ୍ଷ ୪୦ ହଜାର ଟଙ୍କା ବ୍ୟାଙ୍କରୁ ହଡପ କରିନେଇଥିବା ନେଇ ଅଭିଯୋଗ ହୋଇଛି।
ସୂଚନା ମୁତାବକ, ସାନ ପୋଡ଼ାଗୁଡା ଗ୍ରାମର କଲ୍ୟାଣି ସ୍ୱୟଂ ସହାୟକ ଗୋଷ୍ଠୀ ଦୀର୍ଘବର୍ଷ ହେବ ସ୍ୱୟଂ ସହାୟକ ଗୋଷ୍ଠୀ ଗଠନ କରି ଗ୍ରାମରେ ମାଛ ଚାଷ ସହିତ ନେଗିଗୁଡାରେ ଥିବା ଉଚ୍ଚ ବିଦ୍ୟାଳୟରେ ମୋ ସ୍କୁଲ ଯୋଜନାରେ ବିଦ୍ୟାଳୟରେ ଖାଦ୍ୟ ପ୍ରସ୍ତୁତ କରୁଥିଲେ। ବିଭିନ୍ନ ପର୍ଯ୍ୟାୟରେ ଏହି ଗୋଷ୍ଠୀକୁ ରାଜ୍ୟ ସରକାର ତରଫରୁ ପ୍ରୋତ୍ସାହନ ରାଶି ସେମାନଙ୍କ ସଭାପତି ଓ ସମ୍ପାଦିକାଙ୍କ ନାମରେ ଥିବା କୋକସରା କେନ୍ଦ୍ର ସମବାୟ ବ୍ୟାଙ୍କ ଜମାଖାତାରେ ଜମା ହୋଇଥିଲା।ତେବେ ଗୋଷ୍ଠୀର ସଭାପତି ମଧୁସ୍ମିତା ନିଆଳ ଓ ସମ୍ପାଦିକା ନମିତା ଗୋପାଳ ଗ୍ରୁପର ଅନ୍ୟ ସଦସ୍ୟାଙ୍କୁ ଭୁଆଁ ବୁଲାଇ ସେମାନଙ୍କ ଅଜାଣତରେ ବିଭିନ୍ନ ପର୍ଯ୍ୟାୟରେ ବ୍ୟାଙ୍କ ଖାତାରୁ ଜୁନ ୨୦୨୩ ରୁ ଜୁଲାଇ ୨୦୨୪ ମଧ୍ୟରେ ୧୪ ଲକ୍ଷ ୪୦ ହଜାର ଉଠାଇ ହଡପ କରିଥିବା ନେଇଥିଲେ । ଏନେଇ ଗୁରୁବାର କୋକସରା ବ୍ଲକ ପ୍ରଶାସନ ନିକଟରେ ଆସି ସ୍ୱୟଂ ସହାୟକ ଗୋଷ୍ଠୀର ପାରିଜାତ ନିଆଳ, ରଜନୀ ବନିଆ, ପ୍ରେମଶିଳା ନିଆଳ, ଅଷ୍ଟମୀ ହଂସ, ହେମବତୀ ନିଆଳ, ଶୋଭନୀ ନିଆଳ,ଦସମତି ନିଆଳ, ବାସନ୍ତୀ ନିଆଳ ପ୍ରମୁଖ ସଦସ୍ୟା ଅଭିଯୋଗ କରିଛନ୍ତି।ପୂର୍ବରୁ ସ୍ୱୟଂ ସହାୟକ ଗୋଷ୍ଠୀର ମହିଳା ମାନେ ବିଡ଼ିଓଙ୍କୁ ମଧ୍ୟ ଏ ସମ୍ପର୍କରେ ଅଭିଯୋଗ କରିଛନ୍ତି ।
ତେବେ ବର୍ତ୍ତମାନ ସୁଦ୍ଧା କୌଣସି କାର୍ଯ୍ୟାନୁଷ୍ଠାନ ଗ୍ରହଣ ନକରିବାରୁ ପୁଣି ଆଜି ଅଭିଯୋଗ ନେଇ ଆସିଥିଲେ। ଏନେଇ କୋକସରା ବ୍ଲକ ମିଶନ ଶକ୍ତି ବ୍ଲକ ପ୍ରୋଗ୍ରାମ ମ୍ୟାନେଜର ମାନସ ରଞ୍ଜନ ବାରିକଙ୍କ ପ୍ରତିକ୍ରିୟା ନେବାରୁ ଅଭିଯୋଗ ହୋଇଛି । ତେବେ ୮ ଲକ୍ଷ ୭୦ ହଜାର ଟଙ୍କା ସଭାପତି ଓ ସମ୍ପାଦିକା ହେରଫେର କରିଥିବା ତଦନ୍ତରୁ ଜଣାପଡିଛି ।ସେମାନଙ୍କୁ ଟଙ୍କା ଫେରସ୍ତ କରିବାକୁ ବିଭାଗୀୟ କାର୍ଯ୍ୟାନୁଷ୍ଠାନ ନିଆଯିବା ପାଇଁ ନୋଟିସ କରାଯିବ ବୋଲି କହିଛନ୍ତି। ଅନ୍ୟପଟେ କୋକସରା ବିଡ଼ିଓ ଡ଼. ହିମାଞ୍ଚଳ ମାଝୀଙ୍କ ପ୍ରତିକ୍ରିୟା ନେବାରୁ ଅଭିଯୋଗ ହୋଇଛି, ତଦନ୍ତ ଚାଲିଛି ବୋଲି କହିଛନ୍ତି।
