ଭବାନୀପାଟଣା/ଲାଞ୍ଜିଗଡ,୧୨/୦୬: ଦଶମ ବୋର୍ଡ ପରୀକ୍ଷାରେ ଏ-୨ ଗ୍ରେଡ଼ ପାଇ ସମଗ୍ର ବ୍ଳକକୁ ଗୌରବାନ୍ୱିତ କରିଥିବା ଲାଞ୍ଜିଗଡ ବ୍ଲକ ବନ୍ଧପାରୀ ପଞ୍ଚାୟତ ଟିମନବାଡି ଗାଁ ତଥା ବିଶ୍ୱନାଥପୁର ଗୋପବନ୍ଧୁ ହାଇସ୍କୁଲର ଛାତ୍ର ସୁରଜ ନାଗ ଦାଦନ ଯାଇଛନ୍ତି । ପରିବାର ଆର୍ଥିକ ସମସ୍ୟା ଥିବାରୁ କଲେଜରେ ନାମ ଲେଖାଇବା ପାଇଁ ଟଙ୍କା ଯୋଗାଡ଼ କରିବାକୁ ଦାଦନ ଖଟିବାକୁ ଯାଇଥିବା ତାଙ୍କ ପରିବାର ଲୋକେ ସ୍ଵୀକାର କରିଥିଲେ। ଏହି ଖବର "ପ୍ରମେୟ" ରେ ଗତ ୮ତାରିଖ ପ୍ରକାଶ ପାଇବା ପରେ ଏହାକୁ ନେଇ ବିଭିନ୍ନ ସ୍ତରରେ ଚର୍ଚ୍ଚା ହୋଇଥିଲା। ଅଲ୍ ଓଡ଼ିଶା ସିଡ୍ୟୁଲ କାଷ୍ଟ ଫେଡରେସନ ପକ୍ଷରୁ ବାପା ଧନିଆ ନାଗ ସହ ଯୋଗାଯୋଗ କରି ପୁଅକୁ କେରଳରୁ ଡାକିବାକୁ କୁହାଯାଇଥିଲା। ପୁଅ ସୋମବାର ଘରକୁ ଆସିଲା ପରେ ଆଜି ଅଲ୍ ଓଡ଼ିଶା ସିଡ୍ୟୁଲ କାଷ୍ଟ ଫେଡରେସନର ଏକ ଟିମ ସଭାପତି ଧନଞ୍ଜୟ ଦୀପ୍ , କାର୍ଯ୍ୟକାରୀ ସଭାପତି ତେଜରାଜ ବେହେରା, ସାଧାରଣ ସମ୍ପାଦକ ଶତ୍ରୁଘ୍ନ ନାଏକ, କେସିଙ୍ଗା ସଭାପତି ବିଷ୍ଣୁ ମଙ୍ଗରାଜ ଟିମନବାଡ଼ି ଗାଁକୁ ଯାଇ ସୁରଜଙ୍କ ସମ୍ପୂର୍ଣ୍ଣ ପାଠ ପଢ଼ାର ଖର୍ଚ୍ଚ ବୁଝିବା ନିଷ୍ପତ୍ତି ନେଇଛନ୍ତି ।
ପ୍ରାକାଶ ଯୋଗ୍ୟ, ଗତ ମାସ ପ୍ରକାଶିତ ଦଶମ ପରୀକ୍ଷା ଫଳାଫଳରେ ୪୯୮ ମାର୍କ ଏ-୨ ଗ୍ରେଡ଼ ପାଇଥିଲେ। ପରୀକ୍ଷାରେ ସଫଳତାକୁ ନେଇ ପରିବାର ଓ ଗାଁ ଲାକେ, ସ୍କୁଲ କର୍ତ୍ତୃପକ୍ଷ ସମସ୍ତେ ବେଶ ଖୁସି ହୋଇଥିଲେ। ଏପରିକି ସୁରଜଙ୍କୁ ଲାଞ୍ଜିଗଡ ଗୋଷ୍ଠୀ ଶିକ୍ଷା କାର୍ଯ୍ୟାଳୟ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ସମ୍ବନ୍ଧନା ପାଇଁ ମଧ୍ୟ ଡକାଯାଇଥିଲା । ହେଲେ ସମ୍ବର୍ଦ୍ଧନା ସଭାରେ ସୁରଜ ଉପସ୍ଥିତ ହୋଇପାରିନଥିଲେ। ଖବର ନେବାରୁ ଜଣାପଡ଼ିଥିଲା ଯେ, ସୁରଜ ୩ମାସ ହେଲା କେରଳରେ ଦାଦନ ଖଟିବାକୁ ଯାଇଛନ୍ତି । ପରିବାରର ଆର୍ଥିକ ସମସ୍ୟା ତାଙ୍କୁ ଦାଦନ ଖଟିବାକୁ ବାଧ୍ୟ କରିଥିଲା । କେରଳ ରାଜ୍ୟ ଆଲୁଭା ନିକଟସ୍ଥ ଏକ ପଥର କ୍ରସରରେ ସେ ଦିନ ମଜୁରିଆ ଦାଦନ ଶ୍ରମିକ ଭାବେ କାମ କରୁଥିଲେ।
