ନୀଳଗିରି,୧୧/୦୬: ତୃତୀୟ ଶ୍ରୀକ୍ଷେତ୍ର କୁହାଯାଉଥିବା ବାଲେଶ୍ଵର ଜିଲ୍ଲା ନୀଳଗିରିରେ ଦେବସ୍ନାନ ପୂର୍ଣ୍ଣିମା ରୀତିନୀତିରେ ସମାପନ ହୋଇଛି । ବୁଧବାର ସକାଳେ ଦ୍ୱାରଫିଟା ନୀତି ସରିବା ପରେ ସେନାପଟା ନୀତିପୂଜା, ମଙ୍ଗଳାର୍ପଣ, ରାଜନୀତି ବନ୍ଦାପନା ନୀତି ସମାପନା ହୋଇଥିଲା।ରାଜା ଜୟନ୍ତ ଚନ୍ଦ୍ର ମର୍ଦରାଜ ହରିଚନ୍ଦନଙ୍କ ସୁପୁତ୍ର ଜନ୍ମଞ୍ଜୟ ହରିଚନ୍ଦନ ରାଜପ୍ରାସାଦରୁ ଆସି ପୂଜାର୍ଚ୍ଚନା କରି ତିନିଠାକୁରଙ୍କୁ ବନ୍ଦାପନା କରିଥିଲେ । ଏହାପରେ ଛେରାପହଁରା କରି ଚତୁର୍ଦ୍ଧାମୂର୍ତିଙ୍କୁ ସ୍ନାନ ମଣ୍ଡପକୁ ପାଛୋଟି ନେଇଥିଲେ। ପ୍ରଥମେ ସୁଦର୍ଶନ ପରେ ବଳଭଦ୍ର ତାପରେ ଭଉଣୀ ସୁଭଦ୍ରା ସ୍ନାନମଣ୍ଡପକୁ ଯାଇଥିଲେ । ଏହାପରେ ମହାପ୍ରଭୁ ବିଜେ କରିଥିଲେ।ମଙ୍ଗଳ ଆଳତି, ଅବକାସ ସୂର୍ଯ୍ୟପୂଜା, ରୋଷହୋମ ପରେ ୧୦୮ ସୁବାସିତ ଜଳ ସ୍ନାନମଣ୍ଡପକୁ ନିଆଯାଇଥିଲା।
ଏଥିରେ ଶାଳପର୍ଣ୍ଣି,ନାଗପର୍ଣ୍ଣି,ମଂଚିଷ୍ଟା, ଅଶ୍ଵଗନ୍ଧା,ତ୍ରିଫଳା,ଗରଚନା,କସ୍ତୁରୀ,ଜଟାମାସି,ଜାଇଫଳ,ହରିତାଳ,ଶ୍ରୀକର୍ପୁର,ଅଗୁର,ଚନ୍ଦନ ମିଶ୍ରିତ ଜଳ ମହାପ୍ରଭୁଙ୍କୁ ୩୫କଳସ,ବଳଭଦ୍ରଙ୍କୁ ୩୩ କଳସ, ସୁଭଦ୍ରାଙ୍କୁ ୨୨ କଳସ ଏବଂ ସୁଦର୍ଶନଙ୍କୁ ୧୮ କଳସ ସୁବାସିତ ଜଳରେ ସ୍ନାନ କରାଯାଇଥିଲା।ହଜାର ହଜାର ଭକ୍ତ ଏହି ମହାସ୍ନାନ ଜଳ ପାଇବା ପାଇଁ ଉତ୍କଣ୍ଠାର ସହ ଅନାଇ ରହିଥିଲେ । ବିଶ୍ୱାସ ରହିଛି ଯେ, ଏହି ସ୍ନାନଜଳ ସେବନ କଲେ ଶରୀର ସୁସ୍ଥ ରୁହେ।ଚତୁର୍ଦ୍ଧାମୂର୍ତ୍ତିଙ୍କୁ ମହାସ୍ନାନ ପରେ ସକାଳଧୂପ ପୂଜା ସମାପନ ହେବ। ଏହାପରେ ତିନିଠାକୁର ଗଜାନନ ବେଶରେ ଭକ୍ତଙ୍କୁ ଦର୍ଶନ କରିବେ। ସନ୍ଧ୍ୟାରେ ସନ୍ଧ୍ୟା ଆଳତି,ଦକ୍ଷିଣ ଆଳତି ପରେ ଅଣସର ଘରକୁ ରାତ୍ରରେ ତିନିଠାକୁର ଗୋଟି ପହଣ୍ଡିରେ ବିଜେ କରିବେ।
